Reseı Federasııasynyń Astrahan oblysynda ómirge kelgen Janna Ilbalıevanyń múgedektigi bar. Qazir jasy – 39-da. Atyraýǵa bala kezinde qonys aýdarǵan. Alaıda jeke basyn kýálandyratyn qujaty bolmaǵandyqtan, Qazaqstan Respýblıkasynyń azamattyǵyn almaǵan.
– Osyndaı sebeppen ómirlik qıyn jaǵdaıda qalǵan adamdardy qaıta áleýmettendirýge arnalǵan ortalyqta turýyna májbúr boldy. Buǵan deıin oǵan áleýmettik kómek taǵaıyndalmaǵan. Atyraý qalalyq ákimdiginiń tikeleı qoldaýymen bul másele óz sheshimin tapty. Onyń ekinshi toptaǵy múgedektigi men jeke basyn kýálandyratyn qujattardy daıyndap berdik. Endi ol áleýmettik járdemaqy alatyn boldy. Eń bastysy, Qazaqstan Respýblıkasynyń azamattyǵyn aldy. Ákimdik tarapynan arnaıy áleýmettik qyzmetker bólindi, – deıdi Atyraý qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bólimi basshysy Nurly Habıeva.
Qazir páter qujatyn qandastyń atyna rásimdeý júrgizilip jatyr. Páteriniń kommýnaldyq qyzmetterge bereshegi tolyǵymen ótelip, turmysqa qajetti zattarmen, kıimmen qamtylǵan.
Al oblystyq Polısııa departamenti kóshi-qon qyzmeti basqarmasynyń bastyǵy Rýslan Ádilovtiń aıtýynsha, elimizde azamattyq alýdyń jeńildetilgen tártibi 2020 jylǵy tamyz aıynan beri qoldanysqa engizilgen. Bul múmkindikti Reseı Federasııasy men О́zbekstan Respýblıkasynan kóship kelgen qandastar paıdalana bastaǵan.
– Qandastar bir mezgilde Qazaqstan Respýblıkasynyń azamattyǵy jáne turaqty turýǵa yqtııarhat alý úshin qujattar men ótinishti bere alady. Mundaı qujattar men ótinishti qarastyrý merzimi shamamen úsh aıǵa sozylady. Jyl basynan Reseı Federasııasy men О́zbekstan Respýblıkasynan kóship kelgen 16 qandas Qazaqstannyń azamattyǵyn aldy, – deıdi polısııa polkovnıgi R.Ádilov.
Qazaqstan Respýblıkasynyń azamattyǵyn Jeńildetilgen tártippen ıelengen qandastyń qatarynda Qýanyshbek Bazarbaev ta bar. Jasy – 24-te.
– Buryn О́zbekstan Respýblıkasynda turǵan edim. Atajurtymyzǵa kóship kelip, Qazaqstannyń azamaty atandym. Qýanyshymda shek joq. Eldiń azamaty atanǵannan artyq qýanysh bola ma? Endi elimizdiń órkendeýine úlesimdi qosýdy maqsat etip otyrmyn. Kóshi-qon qyzmetiniń qyzmetkerleri azamattyq alýdyń jeńildetilgen tártibin túsindirip, qoldaý kórsetkeni úshin alǵys aıtamyn, – deıdi Q.Bazarbaev.
Atyraý oblysy