Senator Álı Bektaev vıse-premerdiń atyna jazǵan depýtattyq saýalynda bıylǵy jyl el úshin ońaı bastalmaǵanyn aıtty. Onyń aıtýynsha, qylmystyq toptar qarapaıym halyqty óz múddeleri úshin paıdalandy, nátıjesinde kinásiz adamdar zardap shekti, dep habarlaıdy Egemen.kz.
«Bıylǵy jyl elimiz úshin kúrdeli ahýalmen bastaldy. Bul oqıǵa halyqqa da, bılikke de úlken sabaq boldy. Qıyn-qystaý shaqta jaǵdaıdy baqylaýda ustaýǵa mindetti memlekettik organdardyń qaýqarsyzdyq tanytqanyn kórdik. Memlekettiń Táýelsizdigi men bolashaǵyna qaýip tóngen sondaı qysyltaıań kezde Prezıdentimiz Qasym-Jomart Kemeluly Toqaev barlyq jaýapkershilikti óz moınyna alyp, ýaqtyly ári batyl strategııalyq sheshimder qabyldady. Eń bastysy, Prezıdentimizdiń batyl sheshimderiniń arqasynda memlekettigimiz ben elimizdiń tutastyǵyn saqtap qaldyq. Memleket basshysy barlyq jaǵdaıdy ashyp aıtyp, teledıdar arqyly halyqqa der kezinde birneshe úndeý jarııalap, ashyq aqparattyq saıasat ustandy», delingen senatorlar joldaǵan saýalda.
Qazirgi ýaqytta Prezıdent Úkimet aldyna jańa Qazaqstandy qurýǵa baǵyttalǵan naqty mindetter qoıdy. Senator bul baǵytta ulttyq ıdeologııany qalyptastyryp, jastarmen jumysty kúsheıtý kerektigin aıtty. Onyń aıtýynsha, qańtardyń qasiretti kúnderi alańǵa shyqqan jastardyń kópshiligi destrýktıvti kúshterdiń arandatýyna boı aldyrdy.
Ol, sondaı-aq jastar saıasaty zaman talabynan da, jastar talabynan da qalyp otyrǵanyn nazarǵa saldy. Senator jastar saıasatyn formalızmnen aryltyp, olardy tárbıeleý máselesimen tyńǵylyqty aınalysý, elimizde ruqsat etilmegen destrýktıvti dinı aǵymdarmen kúresýdiń naqty sharalaryn qolǵa alý mańyzdy ekenin jetkizdi.
Jedel sheshýdi talap etetin máselelerdiń biri – óskeleń urpaq arasyndaǵy jumyssyzdyq. Senator óziniń depýtattyq saýalynda bul máseleni sheshý úshin de pármendi sharalar qabyldaý qajettigin tilge tıek etti.
«Úkimettiń jyl saıynǵy esepterine qarap otyrsaq, ár óńirde myńdaǵan jumys oryndary ashylyp jatady. Túrli memlekettik baǵdarlamalardyń nátıjesinde kóptegen kásiporyndar ashylyp, júzdegen adam jumyspen qamtyldy degen jańalyqtardy da estımiz. Biraq jastar arasyndaǵy jumyssyzdyq kóbeımese, azaımaı otyr. Sondyqtan Úkimet jumyssyzdyqty joıý isinde jalǵan esepke júginbeı, naqty isterge kóshýi qajet», dep qorytyndylady Álı Bektaev.