Almatyda úsh birdeı qoǵamdyq kólik jol apatyna ushyrady. Qalalyq polısııa departamenti jappaı jol apatynan zardap shekkender joq ekenin aıtty, dep habarlaıdy Egemen.kz.
Apat bolǵan jerde túsirilgen beınebaıan Instagram paraqshalarynyń birinde jarııalandy.
«Qashan da avtobýs júrgizýshileri jol ústinde telefonmen sóılesedi, nemese temeki shegedi, bir-birine jol bermeı, osyndaı apatqa ushyraıdy», dep ashýlandy jeli qoldanýshylary.
Qalalyq polısııa departamentinde túsindirgendeı, jol apaty 11 aqpanda saǵat 10:30 shamasynda bolǵan.
«K. esimdi azamat Yutong Bus markaly avtobýsty basqaryp, Raıymbek dańǵyly boıymen shyǵys baǵytta kele jatqan. Qashyqtyqty saqtamaǵandyqtan, ol H. esimdi azamat basqarǵan SAZ markaly avtobýspen soqtyǵysýǵa jol berdi», dedi Almaty qalasy PD anyqtaý basqarmasynyń bastyǵy Oljas Sháripov.
Onyń aıtýynsha, jol apatynan eshkim zardap shekken joq.
«Bul faktini Áýezov aýdandyq polısııa basqarmasy tergeýde», dep qosty Oljas Sháripov.