Indýstrııa jáne ınfraqurylymdyq damý mınıstrligi Turǵyn úı qurylysynyń shekti qunyn belgileýdi josparlap otyr. Mundaı sheshim bıýdjet qarajaty esebinen salynatyn obektilerge qatysty bolady. Vedomstvo sybaılas jemqorlyq táýekelderin joıý maqsatynda qurylys salasyn sıfrlandyrý jáne avtomattandyrý jumysyn júrgizip jatyr.
Qazirgi ýaqytta «E-Qurylys» aqparattyq júıesi ázirlendi. Ol qazanshuńqyr qazýdan bastap paıdalanýǵa bergenge deıingi qurylys prosesin onlaın-rejimde baqylaýǵa múmkindik beredi. Júıege memlekettik sáýlet-qurylys baqylaý organdary qosylyp, tehnıkalyq qadaǵalaýshylar men ınjenerlik-tehnıkalyq qyzmetkerlerdiń barlyq tizilimi júktelgen. Sondaı-aq, tehnıkalyq qadaǵalaýshylardyń barlyq esebi beriledi.
«E-Qurylys» júıesi tehnıkalyq qadaǵalaý sarapshylaryn obektiler boıynsha baqylap, olardyń túrli óńirde qyzmet kórsetýine jol bermeıdi. Sondaı-aq jobadan aýytqyp ketse nemese jumys tolyq kólemde oryndalmasa, olardy qabyldamaıdy.
Qurylys jobalarynyń smetalyq qunyn jasandy jolmen kóterý táýekelderin azaıtý úshin onlaın-rejimdegi «Onlaın kalkýlıator» júıesi ázirlendi. Bul óńirge jáne obektiniń tehnıkalyq ólshemderine baılanysty jobanyń shekti mánin avtomatty túrde eseptep, belgileýge múmkindik beredi.
Sondaı-aq memlekettik bıýdjet qarajaty esebinen qarjylandyrylatyn áleýmettik obektiler jáne turǵyn úıler úshin shekti qunyn belgileý josparlanyp otyr. Iаǵnı qurylys shyǵyny shekteýli bolady.
Budan basqa, qazir mınıstrlik akkredıtteý boıynsha memlekettik qyzmetterdegi sybaılas jemqorlyq táýekelderin joıdy. Olar tolyǵymen avtomattandyrylǵan jáne 20 mınýt ishinde nátıjesin kompıýter beredi.
Sonymen qatar qurylys jumystaryna lısenzııa berý kezinde endi tikeleı baılanys bolmaıdy. Tehnıkalyq qadaǵalaý, tekserý jáne jobalardy saraptaý boıynsha mamandardy attestattaýdyń biryńǵaı júıesinde testileý fýnksııasy engizildi. Onda synaqtan ótetin adamdy aýystyrýǵa jol berilmeıdi jáne testileý nátıjelerine bógde eshkim áser ete almaıdy. Úrdisti bıyl tolyǵymen avtomattandyrý josparlanǵan.
Qosymsha ruqsat berý qujattary boıynsha memlekettik fýnksııalardy mindetti túrde saqtandyra otyryp, ózin ózi retteýge berý ázirlenip jatyr. Iаǵnı óz qyzmetin ózderi retteıtin uıymdar mamandardy attestasııalap, lısenzııalar beredi jáne olardyń qyzmeti úshin jaýapty bolady.
IIDM qurylys salasyndaǵy sybaılas jemqorlyqty joıý jumystaryn basym baǵytta jalǵastyra beredi.