Bas júlde – «Chelsıde»

Fınaldyq match 42 000 kó­rermendi syıdyra alatyn Mu­hammed bın Zaıed stadıonynda ótti. Birinshi taımda esep ashylǵan joq. Úzilisten keıin qos komanda shıraq qımyldaı bastady. Nátıjesinde, 55-mınýtta Kallým Hadson-Odoıdyń áýeletip bergen pasyn Romelý Lýkaký qaqpaǵa dóp túsirip, aǵylshyndardy alǵa shyǵardy. Arada toǵyz mınýt ótkennen soń brazılııalyqtar tarazy basyn teńestirdi. Bul goldy Rafael Veıga soqty. Negizgi ýaqytta jeńimpaz anyqtalmaǵannan soń oıyn overtaımǵa ulasty. 117-mınýtta Kaı Havers 11 metrlik núk­teden nysanany dál kózdep, kezdesýdiń sońǵy núktesin qoı­dy. Osylaısha, 2:1 esebimen jeńiske jetken «Chelsı» atalǵan jarystyń je­ńimpazy atandy.

Mysyrdyń «Ál-Ahlı» men Saýd Arabııasynyń «Ál-Hılıal» klýbtary arasyndaǵy úshin­shi oryn úshin báseke Al-Na­haııan stadıonynda ótti. Bul matchta Kaırdan kelgen fýt­bolshylardyń ústemdigi esh kúmán týǵyzǵan joq. Olar qarsylastar qaqpasyn tórt márte dál kózdese, saýdııalyqtar birde-bir ret jaýap qaıyra almady. Esep – 4:0. Bul goldardyń avtorlary – Iаsser Ibragım (8 jáne 17-mınýt), Kader Ahmed Abdel (40-mınýt) jáne Ámir ál-Sýllaııa (64-mınýt). Sóıtip, «Ál-Ahlıge» qola medal buıyrdy.

Esterińizge sala keteıik, klýb­tyq álem chempıonaty 2000 jyldan beri uıymdastyrylyp keledi. Sol aralyqta Madrıdtiń «Realy» eń kóp oljaǵa keneldi. Koroldik klýb tórt ret (2014, 2016, 2017, 2018) top jardy. Is­panııanyń taǵy bir komandasy – «Barselona» úsh márte (2009, 2011, 2015) bas júldeni oljalady. San-Paýlýdyń «Ko­rıntıansy» (2000, 2012) men Mıýnhenniń «Bavarııasy» (2013, 2020) eki retten dara shyqty. Brazılııanyń «Inter­nasonal» (2006) men «San-Paýlý» (2005), Italııanyń «Mılan» (2007) men «Inter» (2010), Anglııanyń «Man­­chester Iýnaıted» (2008), «Lı­verpýl» (2019) jáne «Chel­sı» (2021) klýbtary bir-bir márte dál sol bıikten kórindi.