Energetıka mınıstri Bolat Aqsholaqov OKQ brıfınginde «Qazaqstan Reseı Federasııasynan otyn ımporttaýdy josparlap otyr ma?», degen suraqqa túsinikteme berdi, dep habarlaıdy Egemen.kz.
«Jalpy, 2022 jylǵa biz ishki naryqta shamamen 17,9 mln tonna qaıta óńdeýdi josparladyq. Biz bıyl Qazaqstanda JJM aıtarlyqtaı tapshylyǵyn kútpeımiz», dedi Energetıka mınıstri Bolat Aqsholaqov.
Alaıda, onyń aıtýynsha, munaı óńdeý zaýyttarynyń josparlanbaǵan apattyq jaǵdaılarynda Qazaqstannyń Reseıden qajetti janar-jaǵarmaı alýǵa múmkindigi bar.
Mınıstr ótken jylǵy ımport Qazaqstan aýmaǵyndaǵy otynnyń úlken tapshylyǵyna baılanysty bolǵanyn eske saldy.
«Budan buryn, 2012, 2013, 2014 jyldary jańǵyrtý aıaqtalǵanǵa deıin biz shamamen 1 mln tonna benzın, 400 myń tonnaǵa jýyq dızel otyny men shamamen 300 tonnadan astam avıasııalyq kerosın ákeldik. Sol kezde elimizde otyn tapshylyǵy bolǵanyn eskergen jón. Zaýyttardy jańǵyrtqannan keıin, búginde biz benzın, dızel otynyn, keıde, negizinen, qysqy dızel otynyn ákelmeımiz. О́kinishke qaraı, biz avıakerosındi jetkilikti mólsherde shyǵarmaımyz. Ishki tutyný úshin biz óndirgen otyn jetkilikti, alaıda, ártúrli sheteldik avıakompanııalardyń júk jáne jolaýshylar ushaqtaryna avıakerosın jetispeıdi», dep naqtylady QR Energetıka mınıstrliginiń basshysy.