Jambyl oblysynda aýa raıynyń kúrt nasharlaýyna baılanysty respýblıkalyq jáne oblystyq mańyzy bar joldar jabyldy, dep habarlaıdy Egemen.kz.
Jambyl oblysy Tótenshe jaǵdaılar departamentiniń habarlaýynsha, 14 aqpanda saǵat 13:15-te qatty boran, nóldik kóriný jáne aýa raıynyń jalpy nasharlaýyna baılanysty Taraz-Shymkent tas jolynda barlyq avtokólik túrleri úshin qozǵalys jabyldy.
Aýa raıynyń qolaısyzdyǵyna baılanysty Jambyl oblysy polısııa departamenti júrgizýshilerge jol qozǵalysy erejeleri men qaýipsizdik normalaryn saqtaýdy, avtomobıldiń tehnıkalyq jaǵdaıyna muqııat bolýdy, jaıaý júrginshiler jolda paıda bolǵan kezde saq bolýdy eskertedi.
«Qutqarý qyzmetiniń habarlaýynsha, 14-17 aqpan aralyǵynda Jambyl oblysynda aýa raıynyń nasharlaýy, jeldiń kúsheıýi jáne kóktaıǵaq kútiledi. Osyǵan baılanysty Jambyl oblysy polısııa departamenti qysqy jol boıymen (kóktaıǵaqqa, jańadan jaýǵan qarǵa, taptalǵan qarǵa) júrý kezinde avtomobılder arasyndaǵy qashyqtyqty, búıirlik aralyqty, jyldamdyq rejımin qatań saqtaý, sondaı-aq kenetten tejeý men qozǵalysqa jol bermeý qajet ekenin eske salady», dep atap ótti Jambyl oblysy polısııa departamentiniń baspasóz qyzmeti.
Júrgizýshilerge aýa raıy jaǵdaılaryn eskere otyryp, kóliktegi qozǵalys marshrýtyn aldyn ala josparlaýǵa jáne aýa raıy nasharlaǵan kezde eldi mekenderden tys jerlerge shyǵýdy shekteýge keńes beriledi.