«Aıala» qory men Bayer kompanııasynyń ókilderi Qostanaı qalasyndaǵy oblystyq aýrýhananyń perınataldyq ortalyǵyna shala týǵan nárestelerdi qarqyndy emdeýge arnalǵan jańa ınkýbator, bes neonataldy pýlsoksımetr jáne bir elektr sorǵysh tabys etti.
– Ortalyqta jyl saıyn 6 myńǵa jýyq júkti áıel bosanady. Biz jańa týǵan nárestelerge, jas bosanǵan analarǵa jan-jaqty medısınalyq kómek kórsetemiz. Ásirese, salmaǵy óte tómen nárestelerdi emdeýge kóp kóńil bólinedi. Bizdiń reanımasııa 10 orynǵa shaqtalǵan, munda jylyna 600-ge jýyq shala týǵan bala qarqyndy terapııaǵa arnalǵan ınkýbatorlarda dárigerlerdiń kómegimen jetiledi. Neonataldy pýlsoksımetrler jańa týǵan nárestelerdiń ortalyq júıke júıesiniń saqtalýyna tikeleı áser etetin qannyń ottegimen qanyǵý deńgeıin dál jáne tez anyqtaýǵa múmkindik beredi. Sondyqtan bizge naǵyz kerek medısınalyq quraldardy tartý etken qorǵa jáne osy qorǵa qoldaý kórsetken kompanııaǵa alǵys bildiremiz, – deıdi oblystyq aýrýhananyń bas dárigeriniń orynbasary Arman Baımaǵambetov.
Atalǵan qaıyrymdylyq qory 15 jyldan beri elimizdegi perınataldyq ortalyqtar men balalar aýrýhanalarynyń jansaqtaý bólimderin jabdyqtaý jumystarymen aınalysyp keledi. Byltyr «Aıalanyń» «О́mir syılaıyq» jobasy aıasynda elimizdegi perzenthanalar úshin 199 mln teńgege 80 reanımasııalyq medısınalyq tehnıka satyp alynǵan. Qor basshysy Aıdan Súleımenovanyń aıtýynsha, 2021 jyly jınalǵan qarjyǵa bıyl qańtar aıynda Almatydaǵy akýsherlik, gınekologııa jáne perınatologııa ǵylymı ortalyǵyna eki jasandy tynys alý apparaty men eki fototerapııa shamy ornatylǵan.
Qostanaı oblysy