Tuqym qýalaıtyn kesel

Almatydaǵy №2 qalalyq balalar klınıkalyq aýrýhanasynda uıym­das­tyrylǵan semınarǵa «Orfan­dyq júıke-bulshyqet keseli bar pasıentterge jeldetip (ventılıa­sııa­lyq) kó­mek berý» taqyryby arqaý boldy. Semınar tek oqytý, emdeýge ǵana emes, sonymen qatar naýqastardy ońal­týǵa da arnaldy.

Sırek kezdesetin keseldi sapaly emdeý máseleleri talqylanǵan se­mı­nardy ótkizýge Densaýlyq saq­taý mınıstrligi, Júıke-bulshyq­et aýrý­larynyń kópsalaly quzy­ret­ti­lik ortalyǵy, Astana medısına ýnı­versıteti, Qazaqstan-Reseı medı­sı­nalyq ýnıversıteti, №2 qala­lyq balalar klınıkalyq aýrýha­na­sy, «О́mirge sen» qoǵamdyq qory jáne «Balalar nevrologteri, neırofızıologter, psıhıatrler men psıhoterapevtter» qoǵamy atsalys­ty.

Reseıdiń Morozov atyndaǵy balalar klınıkalyq aýrýhanasynyń anestezıologııa jáne reanımasııa jónindegi bas dárigeriniń orynbasary, medısına ǵylymdarynyń kandıdaty Aleksandr Nıkolıshın Qazaqstan jáne Reseı dárigerleri medısınanyń joǵary tehnologııalar men zamanaýı kómek kórsetý ádisterine qol jetkizýi úshin qoldan kelgenniń bárin jasap jatqanyn atap ótti.

Tuqym qýalaıtyn júıke-bul­shyq­­et aýrýlary (TQJBA) genetı­ka­lyq aýrýlardyń úlken toby ekenin atap ótken jón. Bul derttiń asqynyp ketý qaýpi joǵary, ondaı jaǵdaıda naý­­qas­tardyń jaǵdaıy nasharlap, ómiri qysqaryp, tipti onyń saldary qaıǵyly jaǵdaılarǵa jetkizedi.

Sondyqtan mundaı pasıentterdi basqarýdyń eń tıimdi ádisi mýltı­dıs­sıplınarlyq qoldaý. Tynys alýdy qamtamasyz etý – TQJBA bar naýqas­tar­dy emdeý men ońaltýdyń negizgi ba­ǵyttarynyń biri.

Semınar barysynda otandyq mamandar, pýlmonologter teorııalyq bilim men tájirıbelik daǵdylarǵa ıe boldy. Árbir sessııa pikirtalas jáne talqylaýmen ótti. Eń bastysy, dári­ger­ler julyn bulshyq etiniń atrofııa­sy bar pasıenttiń mysalynda tynys alýdy qoldaý jáne qosalqy jeldetý apparatyn qoldandy.

ALMATY