«Atameken» ulttyq kásipkerler palatasynyń sıfrly ekojúıesi «Bızneske arnalǵan úkimet» dep atalady. Palata basshylyǵy jańa ekojúıeniń tujyrymdamasyn tanystyrdy. Bir top kásipker 1 sáýirden bastap jańa júıeni testileý rejiminde synap kórmek.
Qazir aragidik «Atamekendi» de reformalaý týraly áńgime aıtylyp júr. Biraq palatanyń basqarma tóraǵasy Abylaı Myrzahmetov «Atamekenniń» sıfrly baǵyttaǵy transformasııasy 2018 jyly bastalǵanyn jetkizdi. «Bızneske arnalǵan úkimet» sıfrly ekojúıesi – sol ýaqyttan beri júrgizilgen jumystyń nátıjesi.
– Bul platforma arqyly kásipkerler «bir tereze» qaǵıdaty boıynsha 600-den astam memlekettik qyzmetti ala alady. Ulttyq palatanyń qoldaýy men qyzmetteri de osynda toptastyrylǵan. Bıyl jańa júıege qoldaýǵa muqtaj shaǵyn jáne mıkro bıznestiń 1 mln-nan asa sýbektisin engizýdi josparlap otyrmyz. Mundaı alańnyń bizdiń elde balamasy joq. Platformany qoldaný ońaı ári yńǵaıly. Osy jyldyń 1 sáýirinen bastap kásipkerlerdiń bir toby platformada testileý rejiminde jumys istep kóre alady, – dedi A.Myrzahmetov.
Sıfrly ekojúıe shamamen 1,5 mln bıznes sýbektisin (onyń 83 paıyzy shaǵyn bıznes), jeke qosalqy sharýashylyqtardy, kásibin jańa bastaǵan kásipkerlerdi qamtıdy. Biryńǵaı sıfrly terezede kelesideı qyzmetter kórsetiledi: memlekettik qyzmetter men qoldaý sharalary (364 memlekettik qyzmet, 248 qarjylaı, múliktik jáne qarjylaı emes kómek, ınfraqurylymdyq qoldaý sharalary); «Atamekenniń» qyzmetteri (70-ten astam zańnamalyq fýnksııa: NQA saraptamasy, qorǵaý, sertıfıkattaý); kommersııalyq servıster (ERP-platforma, CRM júıesi, eskroý kelisimsharttar, onlaın-kassa, B2B tranzaksııalary, B2C, marketpleıster).
Portaldy qoldaný úshin «Bızneske arnalǵan úkimet» saıtynda elektrondy sıfrly qoltańba (ESQ) arqyly bir ret tirkeýden ótý kerek, egov, elicense, online.damu.kz sekildi memlekettik qoldaý sharalaryn usynatyn servısterdi portaldan shyqpaı-aq paıdalanýǵa bolady. Sondaı-aq munda 4 satyp alý alańyn paıdalaný múmkindigi qarastyrylǵan. Kásipkerlerge memlekettik qyzmetter, «Atamekenniń» qoldaý sharalary men servısterin qosa alǵanda 632 servıs qoljetimdi bolady. Buǵan qosa portaldy 215 aqparattyq júıemen jáne derekter bazasymen ıntegrasııalaý josparlanǵan.
– Ekojúıe kásipkerlerdiń ómirin jeńildetedi. О́ıtkeni kásipti endi qolǵa alǵan adam neden bastaý, kimge júginý keregin bilmeı jatady. Biz kásibimizdi jeke qosalqy sharýashylyǵymyzdan bastadyq. Qazir asyl tuqymdy mal basyn satyp alýdy josparlap otyrmyz. Biz úshin portalda qoldaý sharalary, sýbsıdııa boıynsha kóp paıdaly aqparat bolady dep oılaımyz. Mundaı platformanyń ázirlengeni óte durys, – deıdi «Almajaı» JShS-niń dırektory Gúlmıra Maýsymbaeva.
A.Myrzahmetov túsindirgendeı, kásipkerler qandaı da bir aqparat alý úshin ınternetti sharlap, ýaqyt joǵaltpaıdy. Jumystyń bári kásipkerdiń jeke kabınetinde júrgiziledi. Árbir paıdalanýshyǵa onyń suraýyna qaraı sala, qyzmet túri, bıznes nysany jáne qajettilik negizinde jeke ataýly qyzmetter irikteletin bolady. Budan basqa bıznesmenniń normatıvtik-quqyqtyq aktilerdi saraptaýǵa tikeleı qatysýǵa, bıznes-petısııalardy iske qosýǵa, memlekettik organdar men ulttyq palatadan alynǵan sheshimderge shaǵym jasaýǵa múmkindigi bar.
– Shaǵyn bıznes ókilderinde úreı basym. О́ıtkeni shaǵyn bıznes kómek alýǵa ádettenbegen. Biz jumys isteýge eshkim kedergi keltirmese eken deımiz. Talap-tilegimizdi Úkimetke jetkizýge tyrysyp jatyrmyz. Bul rette jańa platforma kásipkerdi mazalaıtyn naqty máseleni joǵary jaqqa jetkizýge kómektesedi dep senemin. Platformada sot sheshimderiniń bazasy bolsa degen tilek bar. О́ıtkeni ár aýdanda uqsas máseleler boıynsha túrli sheshim qabyldanýy múmkin ekenin jaqsy bilemiz. Sondaı-aq normatıvtik-quqyqtyq aktiler úshin daýys berýge qatysý múmkindigi qarastyrylǵanyna qýanyshtymyz. Sebebi qazir júıe óte kúrdeli. Eger platforma yńǵaıly bolsa, alǵa ilgerileý bolady. Elektrondy qujattama da yńǵaıly bolsa degen tilek bar. Kásipkerler granttar, sýbsıdııalar jáne nesıeler týraly aqparatty qınalmaı alsa nur ústine nur bolar edi, – deıdi kásipker Marına Boshel.
Portalda jeke kabınetti zańdy tulǵalar men olardyń fılıaldary, jeke kásipkerler, sharýa jáne fermerlik qojalyqtar, ózin ózi jumyspen qamtyǵan jeke tulǵalar, qaýymdastyqtar men odaqtar qura alady. Yńǵaıly bolýy úshin jeke kabınette jeke menedjer arqyly máseleni nemese suraqty jedel sheshýge arnalǵan tereze bar. Sonymen qatar jol nusqaýshy qyzmeti de usynylǵan. Barlyq qyzmetti kompıýterden de, mobıldi nusqasynan da alýǵa bolady.
– Bul jerdegi eń basty másele – ashyqtyq. Kásipkerdiń barlyq jeke deregi saqtalyp turady. Sonymen qatar sıfrly operasııalardyń saqtalǵan derekteri boıynsha bıznes ıesi qandaı da bir sheshimge aryzdanyp, oǵan qyzmet kórsetken biliksiz qyzmetkerge shaǵymdana alady. Shaǵym konstrýktorynyń kómegimen nemese 1432 koll-ortalyǵyna júginý arqyly ótinishke jaýaptyń qaıtarylmaǵany týraly habarlaýǵa múmkindik bar, deıdi A.Myrzahmetov.