Erteń Bolgarııanyń bas shahary – Sofııada bokstan dástúrli Strandja-2022 halyqaralyq týrnıriniń jalaýy jelbireıdi. Bıyl 73-shi márte uıymdastyrylyp jatqan baıraqty básekede dúnıe júziniń 40-qa jýyq memleketiniń bylǵary qolǵap sheberleri óner kórsetedi dep kútilýde. Olardyń arasynda qazaqstandyq gúrzi judyryq ıeleri de bar.
1950 jyly tusaýy kesilgen bul doda áýesqoı bokstan Eýropadaǵy eń kóne halyqaralyq jarystyń biri sanalady. Sol jyly uıymdastyrylǵan alǵashqy týrnırde barlyq salmaqta jergilikti sportshylar jeńimpaz atanyp, Hrısto Popov básekeniń eń úzdik boksshysy dep tanyldy. Ýaqyt uzaǵan saıyn Strandja memorıalynyń geografııasy keńeıip, týrnırge alys-jaqyn sheteldiń boksshylary da qatysa bastady. Al Sary qurlyqtyń eń úzdik quramalary sanalatyn Qazaqstan, О́zbekstan, Úndistan, Taıland, Mońǵolııa, Qytaı, Ońtústik Koreıa, Iran, Qyrǵyz Respýblıkasy sekildi elderdiń boksshylary bul dodaǵa sál keıinirek qosyldy.
Halyqaralyq týrnırdiń qanaty keńge jaıylyp, mártebesiniń artýyna burynǵy jáne qazirgi boks juldyzdary zor úles qosty. Atap aıtqanda, Bolgarııadaǵy básekege ár jyldary Helsınkı Olımpıadasynyń qola júldegeri Anatolıı Býlakov, Máskeý Olımpıadasynyń chempıondary kýbalyq Armando Martınes pen bolgarııalyq Petar Lesov, Atlanta Olımpıadasynyń júldegeri Toncho Tonchev, kásipqoı bokstyń asa aýyr salmaǵyndaǵy álemniń eks-chempıony bolgarııalyq Kýbrat Pýlev, Afına Olımpıadasynyń kúmis júldegeri brıtanııalyq Amır Han, Olımpıada jáne álem chempıondary reseılik Aleksandr Povetkın men ıtalııalyq Roberto Kammarelle, Olımpıada jeńimpazy, kásipqoı bokstan álemniń absolıýtti chempıony ýkraınalyq Aleksandr Ýsık, úsh dúrkin Olımpıada, bes dúrkin álem chempıony kýbalyq Felıks Savon jáne taǵy basqa boksshylar osy týrnırde óner kórsetip, júldege talasqan bolatyn.
Al jarystyń eń kóp jeńimpazy kimder degen suraqqa kelsek, qazirgi tańda nebári tórt boksshy ǵana halyqaralyq jarysta eki retten kóp bas júldeni jeńip alǵan. Onyń úsheýi bolgarııalyq boksshylar bolsa, bireýi úndistandyq sportshy. Máselen, Sacho Andreıkovskıı (1974, 1976, 1978, 1979) men Danııl Petrov (1994, 1997, 1998, 1999) básekeniń tórt dúrkin jeńimpazy sanalady. Taǵy bir jergilikti boksshy Serafım Todorov (1989, 1993, 1996) úsh ret tuǵyrdyń eń bıik satysynan kóringen. Al úndistandyq Amıt Pangal bul týrnırde 2018 jáne 2019 jyldary qatarynan eki ret óz salmaǵynda úzdik shyqqan.
Bolgarııa boks federasııasy taratqan aqparat boıynsha, bıylǵy týrnırdiń ýaqyty bir aptadan 10 kúnge deıin uzartylyp, jekpe-jekter Sofııadaǵy «Mıllenıým Grand» qonaqúıinde ótedi. Sondaı-aq Halyqaralyq boks federasııasy (IBA) jarys jeńimpazdaryn yntalandyrý úshin iri kólemde qarjylaı syıaqy taǵaıyndap otyr.
Azııa boks federasııasynyń málimetinshe, Bolgarııadaǵy básekede Sary qurlyqtyń keıingi onjyldyqtaǵy eń myqty boksshylary qatysady dep kútilýde. Álemdik boks derjavalarynyń biri sanalatyn Qazaqstan quramasy sapynan atalǵan jarysta 26 boksshy (erler jáne áıelder) sharshy alańda óner kórsetedi. Olardyń qatarynda byltyrǵy álem birinshiliginiń kúmis júldegeri Mahmud Sabyrhan men jastar arasyndaǵy álem jáne Azııa chempıondary da bar.
Al О́zbekstan quramasy Bolgarııaǵa 26 boksshy aparmaq. Ala taqııaly aǵaıyndar bul týrnırde tájirıbeli boksshylary men jas talanttaryna úmit artady. Atap aıtqanda, aldaǵy jarysta byltyrǵy álem chempıonatynyń júldegerleri Abdýmalık Halakov pen qandasymyz Madııar Saıdrahımov, Rıo Olımpıadasynyń jeńimpazy Hasanboı Dýsmatov jáne Azııa chempıony Saıdjamshıd Jafarov baq synaıdy.
Byltyrǵy Strandja-2021 týrnırinde jerlesterimiz asa sátti óner kórsetti dep aıta almaımyz. О́ıtkeni Tokıo Olımpıadasyna baılanysty birinshi nómirli boksshylar bul týrnırge qatysqan joq. Bapkerler quramy Bolgarııaǵa negizinen jas boksshylardy alyp bardy. Olar: Oljas Baınııazov, Beıbarys Jeksen, Samatáli Tóltaev, Qýan Qýatov, Nurqanat Raıys, Baýyrjan Baıǵonshekov, Saǵyndyq Toǵambaı, Aıboldy Dáýrenuly jáne Ádil Basyǵaraev. Týrnır qorytyndysy boıynsha 9 boksshymyzdyń tek ekeýi ǵana júldege ilikti. 75 kıloda judyryqtasqan Nurqanat Raıys pen jastar arasyndaǵy Azııa chempıony Beıbarys Jeksen (57 kg) qola medal ıelendi.