Mınskidegi «Chıjovka-Arena» sport kesheninde sambo men jaýyngerlik sambodan Belarýs eli prezıdentiniń júldesi úshin Eýropanyń ashyq kýbogy óz máresine jetti. Bul jarysta jergilikti balýandardan bólek, taǵy birqatar memlekettiń ókilderi kúsh synasty. Solardyń arasynda Qazaqstannyń da órenderi bar.
Erler arasyndaǵy básekede Nurdáýlet Áıimbetov (58 kılo) pen Parasat Jumabaı (64 kılo) júldegerler qatarynan kórindi. Ekeýi de qola medaldi ıelendi. Áıelder saıysynda da qos samboshymyz jeńis tuǵyryna kóterildi. 57 kılo salmaqtaǵy Gúldana Álmuhambetova aqtyq synǵa deıin alqyndaı jetkenimen, sheshýshi tusta belarýssııalyq Alena Kýpavanyń osal tusyn taba almady. Nátıjesinde ol kúmis medaldi ıelendi. Al jartylaı fınalda utylǵan Marjan Bızaq (59 kılo) úshinshi orynǵa taban tiredi.
Jaýyngerlik sambodan ótken jarysta Qazaqstannyń ulttyq qurama komandasy mol oljaǵa keneldi. Bizdiń jigitter 1 altyn, 3 kúmis jáne 4 qolany oljalap, atalǵan týrnırdiń jalpy esebinde úzdikter sanatyna qosyldy. Ásirese, Talǵat Jıentaevtyń ónerine erekshe rıza boldyq. +98 kılo salmaqta kúsh synasqan nar tulǵaly qandasymyz barlyq qarsylasyn qoǵadaı japyryp, aqtyq synǵa deıin alqynbaı jetti. Fınalda Talǵat óziniń komandalyq áriptesi Konstantın Rahımovty jeńip, bas júldeni qanjyǵasyna baılady. Bir aıta keterligi, bul sportshylardyń ekeýi de Qostanaı oblysynyń týmalary.
Konstantın Rahımovtan bólek, Erkebulan Qýanǵalıev (58 kılo) pen Málik Baısultanov (64 kılo) kúmispen kúpteldi. Fınalda olar Reseıdiń ataqty balýandarynan aılalaryn asyra almady. Atap aıtsaq, Málik Aleksandr Donsovqa, Erkebulan Vladımır Lımanovqa jol berdi. Al Nurken Dombaev (58 kılo), Ádil Asanhan (58 kılo), Jarashan Samatov (71 kılo) jáne Tımýr Mýkheev (98 kılo) qola medaldi moıyndaryna ildi. Sóıtip, qorytyndy esepte otandastarymyz 1 altyn, 4 kúmis jáne 7 qola medaldi enshiledi.
Mınskidegi jarys kezinde Qazaqstan Respýblıkasy sambo jáne jaýyngerlik sambo federasııasynyń prezıdenti Aıdos Aqjanov Halyqaralyq sambo federasııasynyń vıse-prezıdenti (FIAS) Sergeı Elıseevpen kezdesti. Qos tarap sporttyń osy túrin damytý jolynda qandaı aýqymdy sharýalar atqarylyp jatqany jaıynda aıtyp, aldaǵy josparlarymen bólisti. Sondaı-aq, osy kezdesý barysynda Aqjanov myrza bıylǵy jylǵy Azııa chempıonatyn Aqtaýda jáne Azııa kýbogyn Nur-Sultanda ótkizýge nıetti ekenin bildirdi.