Qostanaı oblysynyń ońtústik aýdandarynda ornalasqan eldi mekenderdiń arasy shalǵaı bolǵandyqtan, qysta saparǵa shyqqan jolaýshyǵa jolda kóldeneń qaýip tónetin kezder az emes. Ásirese, qysqa kúnde qyryq qubylǵan aqpannyń aldyn boljap bilý qıyn. Kún raıy kúrt buzylyp, qarly boran kóterilip ketse, jolǵa shyqqan adamnyń aıdalada qar qursaýynda qalyp qoıýy ábden múmkin.
Tótenshe jaǵdaı qyzmetiniń jedel qutqarý jasaǵy taıaýda ǵana dúleı borannyń ótinde orta jolda qalǵan jolaýshylardy qutqarý boıynsha birneshe operasııany sátti ótkizdi. Qutqarýshylar qar qursaýynan 32 adamdy aman-esen alyp shyqqan. Evakýasııalanǵandardyń arasynda 2 bala bar.
TJ departamenti baspasóz qyzmetiniń málimetinshe, 13 aqpan kúni saǵat 06:25-te Arqalyq – Amangeldi avtojolynyń 20-shaqyrymynda 3 jeńil avtokólik qar qursaýynda qalǵan. Úsh kóliktiń ishinde 15 eresek adam jáne 2 bala bolǵan.
– Jolaýshylar saǵat 08:22-de jol talǵamaıtyn «UQK-600» arnaıy tehnıkasymen Arqalyq qalasyna aman-esen jetkizildi. Zardap shekkender joq. Sol kúni keshki saǵat 19:00-de Arqalyq – Torǵaı baǵytyndaǵy kúre joldyń boıynda, Arqalyq qalasynan 100 shaqyrym jerde qar qursaýynda qalǵan 4 jeńil avtokólik qutqaryldy. Bul kólikterdegi 15 jolaýshy arnaıy qutqarý tehnıkasynyń kómegimen Arqalyq qalasyna jetkizildi. Jolaýshylardyń denesin úsik shalmaǵan, bári din aman bolǵandyqtan, medısınalyq kómekten bas tartty, – dep málimdedi TJD baspasóz qyzmeti.
Qostanaı oblysy