Qazaqstan men Qyrǵyzstan úkimetteri arasyndaǵy Ortalyq Azııa óńiriniń qaýipsizdigin qamtamasyz etýde áskerı-tehnıkalyq kómek kórsetý týraly kelisimdi ratıfıkasııalaý týraly zań jobasy ázirlendi, dep habarlaıdy Egemen.kz.
«Ortalyq Azııa óńiriniń qaýipsizdigi men qorǵanys áleýetin qamtamasyz etý maqsatynda Qazaqstan tarapy Qyrǵyz tarapyna áskerı múlikti óteýsiz berý túrinde áskerı-tehnıkalyq járdem kórsetedi», delingen qujatta.
Bul rette áskerı múliktiń ataýlary men kólemderin kelisimge qol qoıylǵannan keıin eki aı merzimde taraptardyń ýákiletti organdary dıplomatııalyq arnalar arqyly kelisetini kórsetiledi.
«Qyrǵyz tarapy alynǵan áskerı múlikti tek osy kelisimniń maqsattary úshin paıdalanady, úshinshi tarapqa bermeıdi jáne Táýelsiz Memleketter Dostastyǵyna qatysýshy memleketterge qarsy paıdalanbaıdy», delingen qujatta.
Zań jobasy 3 naýryzǵa deıin «Ashyq NQA» portalynda jarııa talqylaý úshin ornalastyrylǵan.