Reseıdegi birqatar sarapshylar jyl basynda elimizde bolǵan oqıǵaǵa qatysty «Tóńkerisshilerdiń maqsaty Prezıdent Qasym-Jomart Toqaevty Qazaqstannan qýyp shyǵý nemese tutqynǵa alý» degen boljam jasady. Memleket basshysy boljamǵa qatysty pikirin ashyq aıtty, dep habarlaıdy Egemen.kz.
– Bálkim, bul Reseıdiń barlaý qyzmetiniń kózqarasy shyǵar. Bul ras ta bolýy múmkin. Olar bizdiń elimizdegi oqıǵalardy muqııat baqylap otyrady ǵoı. Qalaı desek te, arnaıy jasaqtalǵan qarýly bandalar bılikti basyp alǵysy keldi. Sondyqtan, sheteldik sarapshylar aıtqan pikirdiń jany bar dep oılaımyn, – dedi Qasym-Jomart Toqaev.
Sondyqtan barlyǵyna baıyppen qarap, salmaqty baǵa berý qajet ekenin túsindirdi.
– «Sabyr túbi – sary altyn» dep halqymyz beker aıtpaǵan. Bizge keregi – asyǵys sheshim shyǵaryp, isti jaýyp tastaý emes, mindetti túrde aqıqatqa kóz jetkizý. Bul – meniń aldyma qoıǵan maqsatym, – dedi Memleket basshysy Qazaqstan telearnasynyń tilshisine bergen suhbatynda.