Aýyldaǵy qazir tepse temir úzetin jigitter bosaǵasyna bir-bir júırik baılaǵan. Bastary qosyla qalsa, áńgimeniń álibi de jylqy týraly. Taǵy da bir sondaı júzdesý. Keýkeýlesip otyryp Surkójekti esine aldy.
Keshegi keńes zamanynda aldyna jylqy salmaǵan jelqýyq edi. Anyq baǵasyn berý de qıyn, óıtkeni ol kezde jer tanabyn qýyrǵan, aýzymen qus tisteıtin, jaraýy kelisken elý-alpys at qatysatyn uzyn-yrǵasy 25-30 shaqyrymdyq báıge bola qoımaıtyn. Báıge ilýde bir úlken merekelerde ótkiziletin. Onda da mal baqqan malshynyń taqymyndaǵy erqashty janýarlar. Halyq sonyń ózin kádimgideı qyzyq kóretin. Báıgeden keıin keminde bir aı jyr qylyp aıtyp júretin.
– Atbasar jaqtan qarager bıe ákeldim, – degen atqumardyń biri Esenbaı. – Apyrmaı bıeniń de júırigi bolady eken. Bir kúni mal qora jaqtan «qasqyr, qasqyr!» dep aıǵaılaǵan daýys shyqty. Qarager bıeni aýyldyń ortasyndaǵy sýattan sýaryp tur edim. Qıqý qulaǵyma tıgen soń jalma-jan jaıdaq minip aldym da tura shaptym. Barsam shyn qasqyr tıipti. Sharbaqtyń ishindegi taıynshanyń bireýin jaryp, úlpirshek maıyn asap úlgergen. Kórip qalyp attandaǵan malshylardan yǵyp, Qoıandyqyzylǵa qaraı jónep bergen ǵoı. Tura qýdym. Qara jerde qasqyrǵa jetý qaıda, odan eshkim de dámelenbeıdi ǵoı, al men jettim. Quryqsalym jer qalǵanda qolymda ne soıyl, ne qamshy joq ekendigi esime tústi. Jalma-jan úzeńgini sýyryp aldym.
Esenbaı tap bir at ústinde kele jatqandaı áńgimeniń áýenimen aýdarylyp-tóńkerilip, qasqyrdy qara tumsyqtan qalaı soqqandyǵyn kórsetkisi kelip qaryn soza bergende, janynda otyrǵan bireý qolynan ustaı alyp:
– Aý, sen, mana jaıdaq shyǵyp ediń ǵoı?! – dedi.
Esenbaıda ún joq. Temir úzeńgi tumsyǵyna tıgendeı talyqsyp qaldy. Áńgime tyńdap otyrǵan jurt bolsa qyran-topan.
Kókshetaý