Qyzylordadaǵy N.Bekejanov atyndaǵy oblystyq drama teatrynda aımaqqa saparmen kelgen Ortalyq saılaý komıssııasynyń tóraǵasy Nurlan Ábdirov saılaý komıssııalary múshelerimen, saıası partııalar, ÚEU jáne BAQ ókilderimen kezdesti.
Júzdesýde Nurlan Ábdirov sapar maqsaty turǵyndardyń saılaý úderisine qatysty oı-pikirin tyńdap, usynystaryn nazarǵa alý ekenin jetkizdi. Memleket basshysy Qasym-Jomart Toqaevtyń aýyl ákimderin saılaý týraly bastamasy negizinde osy ýaqytqa deıin elimizde 872 ákimdi tikeleı saılaý ótti. Qarapaıym turǵyndardy el basqarý úderisine tartýdy kózdegen bul bastama alda da jalǵasyn tabady. Endi aýdan ákimderin osyndaı jolmen tańdaý úshin tıisti jumystar jasalady.
Nurlan Májıtuly Memleket basshysynyń saılaýdy ádil ótkizý jóninde tikeleı tapsyrma bergenin, aımaqtardaǵy jurtshylyqtyń usynys-tilegin tyńdaýdy da Prezıdent mindettegenin atap ótti.
– Búgingi kezdesýde oı-pikirlerińizdi barynsha ashyq aıtýlaryńyzdy suraımyz. Bárimizdiń maqsatymyz bir, bul – ashyq, ádil saılaý ótkizý. Usynystaryńyz jazylyp alynyp, zerdelenedi. Osydan keıin oblystyq saılaý komıssııasynyń múshelerimen kezdesip, olardyń jumysymen tanysamyz. Sonymen qatar aýyl turǵyndarymen de júzdesemiz, – dedi N.Ábdirov.
OSK tóraǵasymen kezdesýde «Ádildik joly» respýblıkalyq qoǵamdyq birlestigi oblystyq fılıalynyń jetekshisi Lázzat Baqtybaeva saılaý komıssııalary týraly pikir bildirdi. Saılaýlar kezinde barlyq partııaǵa birdeı teńdik prınsıpteri saqtalmaıtynyn jetkizdi. Bıýdjettik mekeme qyzmetkerlerin saılaý komıssııalary quramynan bosatý týraly usynys aıtty. Qoǵam belsendisi portal arqyly daýys berýdi qolǵa alatyn sát jetkenin de aıtyp ótti.
Budan bólek, oblystyq «Syr dıdary» gazetiniń bas redaktory Sáken Aldashbaev, belsendi Erık Teńizbaev, jýrnalıster Qanat Mahanov, Erqanat Sársenbaı, ardager Asylbek Jumabaevtar suraqtaryn joldap, usynystaryn jetkizdi. Zańǵa ózgerister engizý týraly da pikir aıtqandar boldy.
Sapar aıasynda OSK mamandary Dáýren Ysqaqov, Áıgerim Tájıeva aımaqtaǵy saılaý komıssııalary múshelerimen kezdesip, qazirgi talaptar jóninde túsindirme jumystaryn júrgizedi. Byltyrǵy aýyl ákimderin saılaýdan beri de birshama ýaqyt ótti. El basqarýǵa kelgen azamattardyń ıdeıasynan nátıje shyǵatyn kez jetti. Osy sapar barysynda sol aýyldarǵa da baryp, qarapaıym turǵyndarmen tildesý josparlanyp otyr.
QYZYLORDA