Sońǵy ýaqytta oblys dıqandary arasynda jer telimderine qatysty túsinbestik týyndap, arty daýǵa ulasyp jatqany belgili. Syrdarııa aýdanyndaǵy «Shaǵan jer» JShS-daǵy osyndaı jaǵdaı eki jyl qatarynan sozylyp keledi. Eki tarap arasyndaǵy máseleler túıinin tarqatý úshin birneshe ret kezdesý ótkizilip, oblys ákimdigi tarapynan tıisti túsindirmeler de júrgizilgen. Degenmen, tutanǵan daýdyń tútini áli basylmaı tur. Naýqan qarsańyndaǵy daýdyń salqyny erteńgi egis barysyna da keri áserin tıgizeri taǵy anyq.
Osyǵan oraı oblys ákimi Gúlshara Ábdiqalyqova «Shaǵan jer» JShS sharýalarymen kezdesip, talabyn tyńdap, zań aıasynda ortaq mámilege kelýge shaqyrdy. Jıynǵa oblys ákiminiń orynbasary Baqyt Jahanov, oblys ákimi apparatynyń basshysy Erlan Raıǵanıev, oblys prokýrory Nurlan Bıjanov, Syrdarııa aýdanynyń ákimi Murat Ergeshbaev pen salalyq basqarma basshylary qatysty.
Aımaq basshysy seriktestiktegi daýdyń kesirinen aǵaıynnyń arasyna jik túskenin atap ótti. Qyzbalyqqa salynyp, jaǵdaıdy ýshyqtyrmaı, máseleni baıyppen sheshýge shaqyrdy.
– Biz úshin eń mańyzdysy, aǵaıynnyń birligi. Ákimdik sharýalardyń ishki máselelerine, sheshim qabyldaý prosesine aralaspaıtynyn da bilesizder. Tek túsinikteme júrgizip, medıasııa tártibimen sheshý jolyn usynamyz. Degenmen de, úleskerlerdiń bólingen jer telimderine qanaǵattanbaı, bir-birimen kelisimge kele almaı otyrǵany da baıqalyp otyr. Bıyl sý tapshylyǵy ótken jylǵydan da qattyraq seziletin túri bar. Odan shyǵý úshin birigip áreket etýimiz qajet. Taǵy bir márte oılanyp, barlyǵyn kerisý emes, kelisý arqyly sheshýge shaqyramyn, – dedi oblys ákimi.
Jıynda qos taraptyń ókilderi sóz alyp, máseleniń jaı-japsaryn aıtyp ótti. Seriktestik basshysy Jeńisbek Syzdyqov pen úlesker Serikbol Orynbaev daýdyń shyǵý tórkinine tereńdep, óz ustanymdaryn bildirdi. Oblys prokýrory Nurlan Bıjanov seriktestik ókilderin ózara kelisimge kelip, daýlaryn zań aıasynda retteýge shaqyrdy.
Kezdesý sońynda oblys ákimi el ıgiligi úshin ortaq sheshimge kelýdiń mańyzdy ekenin jáne ádiletti qadamdar arqyly ornyqty sheshim qabyldaý qajet ekenin taǵy bir márte eske saldy.
Qyzylorda oblysy