Túrkistan oblysy Saryaǵash aýdanynda 80-ge jýyq otbasy gúl ósirýmen aınalysady. Derbisek aýylynyń turǵyndary qazirgi tańda úıirgelik jerdegi jylyjaıda gúldiń birneshe túrin ósirýde. Byltyr sharýalar 600 myńǵa jýyq gúl ósirgen.
Bir ǵana mysal, bul ispen 20 jyldan beri aınalysyp kele jatqan aýyl turǵyny Mahat Áýeshov 20 sottyq jylyjaı aýmaǵynda raýshan, alstromerııa, hrızantema syndy surypty gúlderdi ósirýde. «Gúl kóshetterin ósirýdiń ózindik qıyndyqtary bar. Egilgen gúldi ár 10-15 kún saıyn sýaryp turý kerek. Jylyjaıdaǵy qalypty temperatýra 10-15 gradýs jylylyqta bolýy shart. Al naýryz aıynyń basynan bastap sabaǵynan qyrqylǵan gúlder satylymǵa shyǵaryla bastaıdy. Mereke saıyn kórshiler men aǵaıyn-týysqa óz aýlamyzda ósken gúlderdi syıǵa tartamyz. Bul kez kelgen jannyń kóńiline erekshe qýanysh syılaıtyny anyq», deıdi kásipker. Búginde kásipkerdiń gúlderine suranys joǵary. Ásirese Shymkent, Almaty, Nur-Sultan qalalarynan arnaıy tapsyrys berýshilerdiń qatary qalyń.
Al aýdandaǵy Jemisti aýyly turǵyndarynyń basym bóligi úıirgelik jerde aǵash kóshetterin óndirýmen aınalysady. Shaǵyn aýylda alma, almurt, órik, shabdaly, shıe, alhory jáne sándik aǵashtardyń birneshe túrin ósirýge basymdyq berilgen. Negizinen jylyna 300 myń shamasynda kóshet óndirilýde, suranys joǵary. Kóshetter respýblıka aımaǵyna arnaıy tapsyryspen tasymaldanýda.
Túrkistan oblysy