Ýaqytynda birinshi aýyr salmaq dárejesinde álem chempıony ataǵyna qol jetkizgen reseılik kásipqoı boksshy Denıs Lebedev kásibı mansabyn qaıtadan bastamaq, dep habarlaıdy Egemen.kz sports.kz-ke silteme jasap.
Bul týraly «REN TV» telearnasynyń bas dırektory Vladımır Tıýlın aqparat taratty.
«Bizdiń bilýimizshe Denıs Lebedev jattyǵýǵa kiristi. Ol kásibı mansabyn qaıta jandandyrýǵa shynymen nıettenip otyr. Sharshy alańda judyryqtasýǵa kelisimin berdi», dedi ol. Derekterge sensek, reseılik ardager boksshy panamalyq Gılermo Djonspen kezdesýi múmkin kórinedi.
Esterińizge sala keteıik, Denıs Lebedev 2019 jyly kásibı mansabyn aıaqtaǵan bolatyn. Ýaqytynda ol IBF jáne WBA tujyrymdary boıynsha birinshi aýyr salmaqta álem chempıony atanǵan.