Qostanaı kóshelerinde jol erejesin buzǵandardy toqtatyp jatpaı-aq, syrtynan avtomatty túrde aıyppul resimdep kete beretin patrýldik polısııa kólikteri júre bastady. Bul kólikterdiń qupııasy – ústindegi túrli-tústi jarqyldatqysh qurylǵysynda.
Ekin patrol dep atalatyn jańa qurylǵy ári aınalasyna «men kele jatyrmyn» dep belgi beretin jarqyldatqysh, ári tóńirekti 360 gradýsqa deıin sholyp, ózinen 70 metrge deıingi qashyqtaǵy avtokóliktiń nómirin jazyp alatyn 10 kameraly «aqyldy» qondyrǵy.
Qostanaı oblysy mundaı qurylǵynyń altaýyn satyp alyp otyr, baǵasy qymbattaý, bireýiniń ózi 35 mln teńge turady. Qazir Ekin patrol ornatylǵan tórt patrýl kóligi Qostanaıda, ekeýi Rýdnyıda jol tártibin baqylap júr.
Jańa baqylaý júıesi buǵan deıin eki aı ýaqyt synaqtan ótken. Synaq merziminiń sońǵy eki kúni ishinde polısııa Ekin patrol kómegimen 100-den astam jol qozǵalysy erejesin buzǵandardy anyqtap, izdeýde júrgen 20 avtokólikti tapqan. Testileý kezeńi bolǵandyqtan eshkimge aıyppul salynbapty. Alaıda endi avtokólik júrgizýshilerdiń jolda abaılap qozǵalýyna týra keledi.
Ekin patrol búginde Qaraǵandy men Kókshetaý kóshelerinde de júr. Túrkııada jasalǵan qurylǵyny Qostanaıǵa Qaraǵandynyń «Gorus» fırmasy jetkizipti. Kompanııa ınjeneri Vıtalıı Okarskııdiń sózine sensek, kólik ústindegi «aqyldy» kameralar avtomatty rejimde jáne naqty ýaqyt rejiminde birdeı jumys isteıdi. Jol tártibiniń buzylǵany týraly málimetterdiń bárin adamnyń qatysýynsyz derekqorǵa jiberip otyrady.
– Baqylaý júıesi aldy-artyndaǵy jyldamdyq mólsherin asyrǵan mashınalardy jazyp alyp otyrady jáne izdeýdegi avtokólikterdi anyqtaıdy. Radary 120 metrge deıingi radıýsta jumys isteıdi. sondaı-aq 70 metrge deıingi kólikterdi anyq kóre alady, – dedi V.Okarskıı.
Ákimshilik polısııa basqarmasyna qarasty avtomattandyrý jáne elektrondy qyzmet kórsetý tobynyń ınspektory Baýyrjan Nuǵymanovtyń aıtýynsha, jańa patrýl jol boıynda durys turmaǵan mashınany da, joldaǵy jolaqtan asyp ketken nemese qyzyl belgige ótip ketken avtokólikterdi de túsirip alady. Jyljymaly baqylaý júıesiniń basqa kameralardan basty ereksheligi – qalanyń kez kelgen kóshesinde táýligine 7 saǵat boıy kezekshilik etedi.
Vıtalıı Okarskıı qurylǵy qymbat bolǵanymen, qunyn tez ótep alady deıdi. Eń bastysy, endi jol erejesin buzatyndar azaıady. О́ıtkeni kólik júrgizýshilerdiń kóbi jol boıynda, bir orynda ilinip turǵan kameralardyń mańynda ǵana ereje saqtaıdy, al jyljymaly kamera kez kelgen jerde abaılap, ereje saqtap júrýge úıretedi.
Qostanaı oblysy