Beıjińdegi Qysqy Olımpııa oıyndaryna baılanysty ýaqytsha toqtatylǵan shaıbaly hokkeıden Qurlyqtyq hokkeı lıgasynyń (QHL) oıyndary kóktemniń alǵashqy kúninen bastap qaıta jalǵasady. Iаǵnı Gagarın kýbogy jolyndaǵy pleı-off kezeńine joldama alǵan 16 komanda 1 naýryzdan oıyndarǵa kirisedi. Úzdikter qatarynda elordanyń «Barysy» da bar.
Áýelgi jospar boıynsha QHL-dyń qalǵan oıyndary Olımpıadadan keıin ótkizilýi tıis edi. Alaıda birneshe matchtyń keıinge shegerilýine jáne jarys kestesiniń tyǵyzdyǵyna baılanysty turaqty birinshiliktiń prezıdenti Alekseı Morozov bıylǵy maýsymdy merziminen buryn aıaqtaýǵa májbúr bolǵandyǵyn málimdegen edi. Sóıtip Lıga basshylyǵy turaqty chempıonattyń qańtar aıyna deıingi aralyq nátıjelerin eskere otyryp, pleı-offqa shyqqan komandalardy jınaǵan upaı sandarynyń paıyzyna qaraı iriktep aldy.
Elordalyq komanda turaqty birinshiliktiń týrnır kestesinde 8-orynǵa taban tirep, Gagarın jolyndaǵy kýboktyń pleı-off kezeńine tikeleı joldama alady. Jarys erejesine sáıkes, pleı-offqa sońǵy orynmen shyqqan komanda alǵashqy oıynyn týrnır kestesinde birinshi oryn alǵan ujymmen ótkizedi. Al «Shyǵys» konferensııasyndaǵy týrnır kestesinde Magnıtogorskiniń «Metallýrgi» kósh bastap turǵan edi.
Eń qyzyǵy, «Barys» pen «Metallýrg» ujymdary bıyl qatarynan úshinshi jyl pleı-off kezeńiniń birinshi oıynynda kezdeskeli tur. 2019/2020 jylǵy maýsymnyń 1/8 kezeńinde komandalar bes oıyn ótkizip, elordalyq komanda 4:1 nátıjesimen kelesi kezeńge ótken edi. Alaıda sol jyly álemdi sharpyǵan koronavırýs indeti barlyq elge tarap, saldarynan sol jylǵy jarysta kýboktyń jeńimpazy anyqtalǵan joq.
Kelesi 2019/2020 jylǵy pleı-off básekesiniń alǵashqy aınalymynda eki klýbtyń joly qaıta túıisti. Alty oıynǵa jalǵasqan bul jolǵy tartysta «Metallýrg» hokkeıshileriniń mereıi ústem boldy – 4:2. Alaıda Magnıtogorskiniń komandasy shırek fınalda dál osyndaı eseppen bolashaq Gagarın kýbogynyń ıegeri Ombynyń «Avangardynan» jeńilip qaldy.
Endi, mine, eki klýb bıyl úshinshi márte pleı-offtyń alǵashqy kezeńinde baq synaıdy. Ázirshe komandalardyń enshisinde bir-bir jeńis bar. Bul joly jeńiske jetken komanda jeke esepte alǵa shyǵady. Aıta keteıik, «Barys» pen «Metallýrg» QHL-dyń bıylǵy maýsymynda muzaıdynda tórt márte kezdesip, eki komanda da eki retten jeńiske jetken.
Pleı-off oıyndarynyń alǵashqy eki matchy 1 jáne 3 naýryz kúnderi Magnıtogorskide, keıingi eki kezdesý 5 jáne 7 naýryzda elordada ótedi. Jarys erejesine sáıkes pleı-off básekeleri bir komanda tórt ret jeńiske jetkenge deıin jalǵasady. Eger tórt oıynda jeńimpaz komanda anyqtalmasa, qosymsha oıyndar ótkiziledi. Bul matchtar 9 naýryz (Magnıtogorsk), 11 naýryz (Nur-Sultan) jáne 13 naýryz kúnderine (Magnıtogorsk) josparlanǵan.