Kúnuzaq tapjylmaı muz tesip, qarmaq salyp otyrǵan balyqshylar mamandardyń eskertýlerine, shekteýlerine qulaq asa bermeıdi. Áıtpese, qystaı úsh balyqshy muz astyna keter me edi?! О́zen-kólderge qabyrshyq muz qatqan kúnnen bastap, tótenshe jaǵdaı mamandary shyr-pyr bolyp, aldyn alý jumystaryna kirisedi.
Kóktem shyǵa qar kóbesi sógilip, muz betindegi qaýip qaıta kúsheıedi. Ádettegideı TJD mamandary jýyqta eskertý jumystaryn júrgizdi. Muz betindegi ereje jazylǵan paraqshany taratyp qana qoıǵan joq, balyq bolyp kıingen mamandar muz oıyp, qarmaq salýdyń erejelerin egjeı-tegjeıli qaıta bir túsindirdi. Erekshe kostıýmge kók muzda shoqıyp otyrǵan áýesqoılardyń barlyǵy derlik nazar aýdardy. Balyq keıpinde júrýleriniń sebebi – aıtqan eskertýleri balyqshylardyń esinde qalsyn degenderi.
– Muz qalyńdyǵy 10 santımetrden az bolsa, adam úshin qaýipti. Táýliktiń qarańǵy ýaqytynda jáne boran-shashyndy, tumandy kúnderi muz betine shyǵýǵa bolmaıdy, – deıdi balyq bolyp kıingen qutqarýshylar.
Erejege sáıkes balyqshylar muz aıdynyna shyqqanda, qutqarý keýdeshesin kıip, uzyndyǵy keminde 12 metr arqan ala shyǵýy kerek. Múmkindiginshe, sý ótkizbeıtin paketke salynǵan uıaly telefony janynda bolǵany abzal. Eger qaýipti jaǵdaıǵa tap bolsa, 112 nómirine habarlasýy kerek. Alaıda joǵaryda aıtylǵan qarapaıym ǵana erejeler esterinde bolsa, qaýipti jaǵdaıǵa tap bolýy ekitalaı.
Shyǵys Qazaqstan oblysy