Kóptegen adamdardyń pikirinshe 2022 jyldyń 22 aqpany - qasıetti maǵynaǵa ıe kún. Ásirese, otaý qurýǵa nıettengen jastar osyndaı erekshe kúnderde zańdy nekege turýǵa tyrysady, dep habarlaıdy Egemen.kz Nur-Sultan qalasynyń ákimdigine silteme jasap.
Tańerteńnen bastap AHAT-tyń astanalyq bólimderinde jas jubaılar ózderiniń alǵashqy otbasylyq qujattaryn alý úshin tizilip turdy. Búgin Nur-Sultanda kúnniń sońyna deıin 240-qa jýyq jup neke qııý rásimin ótkizedi.
«Aına dep atalatyn búgingi kún sııaqty kúnder jas jubaılar arasynda suranysqa ıe. Eger, mysaly, Esil aýdanynda kúnine orta eseppen 30-40 jup tirkelse, búgin jumys kúniniń sońyna deıin 100-ge jýyq tirkeý kútilýde. Jas jubaılarǵa baqytty otbasylyq ómir, myqty neke tileımin, bul kún olarǵa sáttilik pen amandyq ákelsin», dep atap ótti Esil aýdany ákimdiginiń AHAT bóliminiń basshysy Raýshan Zarırova.
Aıta ketý ketsek, sońǵy jyldary elordada nekeni resmı túrde tirkegen jańa otbasylardyń sany únemi ósip keledi. 2020 jyly 9 571 jup otaý qursa, 2021 jyly bul kórsetkish 12 myńǵa deıin jetti.
4-5 jyl buryn jas jubaılardyń ortasha jasy 22-23 jasty qurasa, búgingi tańda 26-28 jas aralyǵyndaǵy jastar nekege otyrady. Tek jastar ǵana emes, sonymen birge 50-60 jáne tipti 70 jastaǵy eresekter de aq nekelerin qııady.