Kásipker salǵan úı paıdalanýǵa berildi

Báıterek aýdanynyń orta­ly­ǵy Peremetnyı aýylynda árqaısysy 2 páterli 4 turǵyn úı salyndy. «Súndetov» sharýa qojalyǵynyń basshy­sy, Báıterek aýdandyq máslıha­ty­nyń depýtaty Esen Súndetov salǵan ár úıdiń aýmaǵy – 69 sharshy metr. Úıler ınfra­qu­rylymmen tolyqtaı qam­tyl­ǵan, aýlasy qorshalǵan jańa úılerdiń qurylysy aıaqtalǵan soń jergilikti ákimdik ony tıimdi baǵaǵa satyp aldy. Sóı­tip, úı kezeginde turǵan ár­túr­li sanattaǵy – kópbalaly, múm­kin­digi shekteýli, asyraýshysynan aıyrylǵan, apatty úı ıeleri, t.b. tulǵalar men asa qajet mamandyq ıelerine jalǵa berildi.

– Táýelsizdik alǵan 30 jyl ishinde el úkimeti azamattardyń barlyq jaǵdaıyn jasaýǵa jáne laıyqty baspanamen qamtýǵa kúsh salyp keledi. Byltyr el Táýelsizdiginiń 30 jyldyq to­­­ıyna aýdan úlken jetistikpen jetti. Aýdan turǵyndarynyń ál-aýqatyn kóterý, Prezıdent tapsyrmasyn iske asyrý jolynda biraz jumys atqaryldy. Negizinen, aýyl turǵyndaryn tolǵandyratyn jol, gaz, sý máselelerin retteýge kúsh sal­dyq. Osy máselelerdi sheshý­ge kómek kórsetken aýdan kásip­ker­leri men merdigerlerge rı­za­­shylyǵymyz shekiz. Jańa úıdiń ár buryshy qýanysh pen shat­tyq­qa jáne baqytqa tolsyn, – dedi jańa úılerdi tapsyrý saltanatynda Báıterek aýdanynyń ákimi Marat Toqjanov.

Bul kúni jańa úıge kirip, qonys toıyn toılaǵan Aqmanar Ǵalıeva baspana kezeginde 2007 jyldan beri turǵan eken. Jańa páterge ıe bolǵan zeınetker baspana salyp, ony qajet etken otbasylarǵa bergen aýdan basshylyǵyna rızashylyǵyn bildirdi. Merdiger Esen Súnde­tov úı ıesine sý jańa ki­lem tartý etti.

Aıta keteıik, jańa baspanaǵa ıe bolǵandardyń qatarynda óńirge óte qajetti mamandyq ıeleri de bar. Mysaly, osy kúni aýdandyq aýrýhananyń jalpy tájirıbedegi dárigeri Elena Marat ta jańa úıdiń kiltin aldy. Aýdanǵa kelgenine kóp bolmasa da, baspanaly bolǵan jas dáriger endi ata-anasyn kóshirip almaq.

– О́te qýanyshtymyn! Endi esh alańsyz qyzmet etip, elge paıdamdy tıgizýge kúsh salamyn, – deıdi jas maman.

Batys Qazaqstan oblysy