Aqtóbe oblystyq drama teatrynda aqyn Svetqalı Nurjannyń avtorlyǵymen jazylǵan «Er Edige» tarıhı dramasynyń alǵashqy qoıylymy boldy. Rejısseri – Danııar Bazarqulov. Kúlli Deshti Qypshaq dalasyna ortaq batyrǵa arnalǵan etno-folklorlyq tarıhı drama Altyn Ordanyń 750 jyldyǵyna arnalǵan.
Spektaklde Edige batyr zamanynyń tutas dáýiri emes, Toqtamys hannyń Ordasyndaǵy taq talasyndaǵy shıelenisti oqıǵalar keıipkerlerdiń basty is-áreketi arqyly qamtylǵan. Oqıǵa Toqtamystyń han ordasynda órbıdi.
«Toǵaıbek hanym, Toqtamystyń áıeli dalanyń eki kókjaly Toqtamys han men Edigeniń arasyn shıelenistirip, olardy bir-birine dushpanǵa aınaldyrady. Sondaı-aq spektaklde Ámir Temir men Edigeniń qarym-qatynasyna qatysty epızodtar bar», dedi rejısser Danııar Bazarqulov. Qoıylymdaǵy tarıhı oqıǵalar Edige batyrdyń qaharmandyq erligi jyrlarymen ásemdele túsken.
Premeraǵa «Er Edige» tarıhı dramasynyń avtory Svetqalı Nurjan bastaǵan Mańǵystaý, Batys Qazaqstan oblystarynan biraz qonaq keldi. Bir jarym saǵatqa sozylǵan spektaklden soń oblys ákimi Ońdasyn Orazalın kórermenderge «Aıtýly oqıǵanyń kýási bolǵan kórermenderge qoıylymnyń oqıǵa jelisi urpaqtarynyń tarıhı jadymyzdy oıatatynyn» aıta kelip, Edigeniń tarıhtaǵy orny men mańyzy áli kúnge deıin tolyq zerttelmegenine nazar aýdardy. «Sońǵy jyldary Aqtóbe oblysynda uly batyrdyń esimin jańǵyrtý jáne este saqtaý baǵytynda aýqymdy jumystar atqaryldy, ıaǵnı halyqaralyq ǵylymı-tájirıbelik konferensııalar ótkizilip, eskertkish ornatyldy, «Er Edige – Noǵaıly dáýiriniń jyry» atty albom jınaǵy tanystyryldy. Aldaǵy ýaqytta da el ishinde jınalmaı jatqan baı mádenı muramyzdy jınaqtaý jáne birizdendirý boıynsha aýqymdy jumystar jalǵasa beredi», dep atap ótti.
Aqtóbe oblysy