Otandy súıý degen sóz – onyń ár túıir tasyn, ózeni men kólin, ormany men shólin súıe bilý degen sóz. Osyndaı sheksiz mahabbattyń, súıispenshilik pen adaldyqtyń tumsa tunyǵynan uly týyndylar ómirge keledi. Ulttyń maqtanyshyna, memlekettiń nyshanyna aınalǵan mundaı qundy dúnıe – kókte jelbiregen Kók Baıraǵymyz. Búgingi áńgimemizdiń arqaýy Memlekettik Týdyń avtory, qazaq halqynyń bir týar uly Sháken Ońlasynuly Nııazbekov týraly bolmaq.
Elbasy Nursultan Nazarbaev bir sózinde «...Sháken Ońlasynuly jumystaryn negizinen patrıottyq turǵyda jazdy, onyń Qazaqstan Respýblıkasynyń Memlekettik Týynyń avtory bolýy – týma talantymen qatar, Otanyn sheksiz súıgendigi dep bilemiz. Táýelsizdigimiz baıandy bolǵan saıyn Sháken Ońlasynulynyń rýhy halqymen birge máńgi ómir súre bermek», degen bolatyn. Sháken Nııazbekov týma talanty men Otanǵa degen sheksiz súıispenshiliginiń arqasynda eldigimiz ben táýelsizdigimizdi aıǵaqtaıtyn, búginde álem jurtshylyǵy anyq tanıtyn aıshyqty týyndyny usyna bildi.
Qazaqstan Respýblıkasynyń Memlekettik Týy – ortasynda shuǵylaly kún, onyń astynda qalyqtap ushqan qyran beınelengen tik buryshty kógildir tústi mata. Týdyń sabynyń tusynda ulttyq órnek tik jolaq túrinde naqyshtalǵan. Kún, onyń shuǵylasy, qyran jáne ulttyq órnek beınesi altyn tústes bolyp keledi.
Kókte jelbiregen baıraǵymyz týraly Sháken aǵa jýrnalısterdiń «Memlekettik Týdyń avtory boldyńyz degen habardy estigende, qandaı sezimde boldyńyz?» degen suraǵyna «Eń aldymen, Parlament bekitken Týdyń osy úlgisi halqymyzǵa unaı ma eken, halqymyzdyń tańdaýyna, talǵamyna sáıkes kele me eken degen qobaljý sezimi basym boldy. Boıymdy bir túrli qorqynysh sezimi bılegendeı kúı keshtim», dep jaýap bergen edi.
Shákenniń jaqyn týysy bolyp keletin inisi, medısına ǵylymdarynyń doktory Saılaýbek Shalqarov Sháken aǵanyń Týdyń dúnıege kelgen sáti týraly bylaı deıdi: «Aǵanyń úıi burynǵy Kommýnısttik dańǵyly boıyndaǵy «Qarakóz» kafesiniń úshinshi qabatynda bolatyn. Almatydaǵy jumys ornymdy Túrkistan qalasyna aýystyrǵanǵa deıin Sháken aǵamen jıi aralasyp turdym. Aǵa bir kúni meni úıine shaqyryp alyp, Prezıdent Ákimshiliginde Erbol Shaımerdenov degen inishek Memlekettik Týdy ázirleý úshin konkýrsqa túsýimdi qalap otyrǵandyǵyn aıtty. Osylaısha, konkýrsqa qatysýǵa bel baılaǵanyn jetkizdi. «Myna joba-syzbalarymdy qarashy», dep salǵan birneshe týyndysyn kórsetýmen boldy. Bir sýreti bir sýretinen artyq salynǵandaı kórinedi. Sháken aǵa bul sýretter jaıly emes, qazaq tarıhyna oıysyp kete bergeni esimde. Kúnde úıine shaqyrady. Ár salǵan jobalary kúnnen-kúnge ózgeshe bolyp shyǵady. Sýretterinde jalpy tarıh baıandalady. Men sony kórip bilgendeı boldym. Kúnige pikirin tyńdatý úshin shaqyrady. Men qarsy bolmaımyn. Baramyn. Kóp uzamaı kók týdyń naǵyz nusqasy dúnıege keldi. Sondaǵy aǵanyń júzindegi qýanyshty aıtyp jetkizýdiń ózi bir baqyt eken!»
Qazaqstandyq patrıotızm – bul memleketimizdiń rýhy. Kórnekti tulǵanyń biregeı týyndysy sanalatyn Týymyzdy el tizginin ustaǵan azamattar súıip, halyq aldynda ant beredi. Qasterlep, aıryqsha baǵalaıdy. Jiger men namysqa arqa súıep, bıik tuǵyrdan kóringen sport sańlaqtarymyz jahandy jalt qaratqan sátte Kók Baıraǵymyz jelbireıdi. Patrıotızm – ıdeologııamyz bastaý alatyn kúsh-qýat kózi bolsa, Memlekettik Týymyz – rýh pen jigerdiń qozǵaýshy kúshi ispetti.
Taǵy bir aıta ketetin dúnıe – Qazaqstanǵa aıbar men qaırat berip turǵan úsh terek bar. Úsh terek dep otyrǵanymyz – Tý, Eltańba jáne Ánuran. Bul úsheýin biriktiretin baılanystyń elementteri dara hám erkin. Olar organıkalyq jaǵynan birtutas. Olar rýhanı sulýlyqtyń, ádilettilik pen sabyrlylyqtyń beınesin bildirip, bir-birin úılesimdi tolyqtyryp tur. Oǵan Sháken Ońlasynulynyń qosqan úlesi – ushan-teńiz.
Ǵalymjan MYRZALY,
Qazaqstan Respýblıkasy
Bilim berý isiniń
qurmetti qyzmetkeri