Dúnıede eń aıaýly kórinis – sábıdiń alǵashqy adymyn basqan sáti. Úlken ómirge qaraı jyljyǵan kishkentaı baldyrǵannyń eńbeginde ananyń jan tolǵanysy jasyrynyp jatady. Ata-ananyń baýyrynan uzap shyqqan náresteniń erteńgi ómiri árbir basqan qadamynan bastaý alsa kerek. Jolbelgisiz joldarda ómir baǵdarshamyna qaramaı alǵa umtylǵan balanyń talabynda taǵdyrynyń móri bar.
Dál osy sátte sýretshi ómirge bir sát sábı kózimen qaraǵan sekildi. Vertıkal formatty tańdaı otyryp, kompozısııany joǵarǵy rakýrstan baqylaý arqyly kenepke qondyrǵan qylqalam sheberi Quralaı Úmbetova bizge osyndaı tamasha kartına syılady. 2011 jyly jazylǵan «Qadam» shyǵarmasy – avtordyń analyq meıiriminen týǵan erekshe týyndy.
Sýretker ulynyń qutty qadamyna qarap ómir jolynda kezdeser belesterdi ońaı attap óterine senim bildirip turǵandaı. Qym-qıǵash syzyqtarmen shaqpaqtana túsken eden men bıik munaraly kópqabatty úıler sılýeti jáne qalyqtap kóshken kók aspan kenep betinde kerile túsedi. Edende eńbektep bara jatqan bala bir sátte kókke, beleske órmelep bara jatqandaı áser qaldyrady. Sábıdiń bul áreketin janynda qımylsyz jatqan dop qana toqtatqandaı. Dóńgelek pishin qozǵalystyń sımvoly.
Baqsańyz, doptyń qozǵalyssyz beınesi kórermen kózin onyń jazyqtyqta ornalasqanyna ılandyrady. Kózimizdi edendegi syzyqtardy boılaı keneptiń joǵarǵy jaǵyna qaraı balamen birge jyljytsaq jazyqtyqtyń keńistikke ulasqan sátin tamashalap, qııalǵa erik beremiz. Jazyqtyq keńistikke ulasyp, týyndyda olardyń ıllıýzııasy kezek-kezek kórermen nazaryn aýlaıdy.
Quralaı Úmbetova shaqpaqty lınolıým bederin sátti paıdalana otyryp, eden men aspannyń 3D kórinisi arqyly perzentiniń bolashaq ǵumyrynyń bulyńǵyr bolmaýyn tileıdi. Aspanynyń ashyq, jolynyń dara, alar belesiniń aıqyn bolǵanyn qalaıtynyn baıqaımyz. Bul tek sýretshiniń emes, barlyq ananyń asqaq armany ekeni anyq. Sýretker ómirge sábı ákelgen aıaýly jandardyń kóńil tolqynysyn jetkizip tur.