Belsendi berekege keneledi

Zerendi aýdanynda 500-ge jýyq jańa jumys orny ashyldy. Tarazy basyna tartyp baǵamdasańyz, bul óte úlken kómek. Memlekettik baǵdarlama boıynsha onda­ǵan adam qaıta daıarlaý kýrstarynan ótip, jańa mamandyq ıgerýde.

40 myńǵa jýyq turǵyny bar aýdan­ ­kásip bastap, yrysyn arttyrýǵa múm­kin­digi zor qolaıly jerge ornalasqan. Eń aldymen, bul ólkede týrızm salasynda tııanaqty jumys isteýge ábden bolady. Jadyraǵan jaz aılarynda máńgi jasyl qaraǵaılar men qoldyń salasyndaı aqqaıyńdar kómkergen, kúmis sýly kólderi tananyń kózinde jarqyrap jatqan jer jánnatyna kelýshiler kóp. Demek, bul tarapta kóńil kózi túspegen kásip tunyp tur deýge bolady.

Sońǵy jyldary jappaı kásipkerlikti da­my­týǵa baǵyttalǵan memlekettik baǵ­­­­­dar­l­amalar óz jemisin bere bastady. «Bas­taý – Bıznes» baǵdarlamasy bo­­­­ıynsha ótken jyly 58 grant ta­ǵaıyn­dalyp, jal­py kólemi 34 mln teńgeniń bıznesi qarjylandyryldy.

– Aýdanda aýyl sharýashylyǵy jaqsy damyp keledi. Adamdardyń da tabys­ty salanyń tuǵyryn bıiktetýge yntasy zor, – deıdi aýdandyq jumyspen qamtý ortalyǵynyń dırektory Asan Smatov, – granttyń negizgi bóligi mal sharýashylyǵyna baǵyttalyp otyr. Atap aıtqanda, 29 grant osy salaǵa tıe­si­li, 19 grant halyqqa qyzmet kór­se­tý salasyna bólindi. Onyń ishinde jer­gilikti jaǵdaıdy eskere otyryp, qo­ǵamdyq tamaqtandyrý oryndaryn kó­beı­tý kózdelýde. El eńbekke yntaly. Sózim dáleldi bolýy úshin dáıek keltirý qajet bolsa, ótken jyly 170 adamnyń «Bıznes – Bastaý» baǵdarlamasy bo­ıyn­sha bilimderin jetildirgenin jáne olar­dyń basym kópshiliginiń óz isterin ash­qan­dy­ǵyn aıta ketsem de bolar.

Eńbek etsem dep umtylǵandardyń biri – aýdan turǵyny Anastasııa Gýslıarova. Ol kásibin qaı taraptan ashý qajettigin ábden oı eleginen ótkizgen. Kóńiline qolaılysy sán salony bolyp shyǵypty. Aýdan turǵyndary úshin suranysqa ıe sony kásip. Áıtse de, birden bel býyp kirisýge batpaı, salanyń salmaǵyn, ózindik erekshelikterin jan-jaqty zerttegen. Tipti elordadaǵy talaptyǵa bereri mol arnaıy biliktilik kýrstarynan da ótken. Osyndaı tyńǵylyqty daıyndyqtan keıin baryp memlekettik baǵdarlamaǵa qatysyp, grant utyp alǵan. Astanadan 808 tolqyndy dıodtyq lazer satyp alypty. Kýrs aıaqtalǵan soń sertıfıkatyn da ıelengen. Qazirgi kúni óz sharýasyn urshyqsha úıirip otyr.

Alǵa umtylǵandar az bolmaǵanymen, jumyssyzdyq múldem joıylyp ketken joq, resmı derek boıynsha áli de jetpisten astam adam jumyssyz. Osy arada bul máseleni sheshýge baǵyttalǵan tıimdi ártúrli baǵdarlamalardyń bar eken­digin aıta ketýge tıistimiz. Tek ja­nym­dy jaldap jumys istep, tabysym­dy kóbeıtemin deıtin nıet bolsyn deńiz.

Aqmola oblysy,

Zerendi aýdany