Kún raıy kúrt jylynyp, qar kóbesi sógile ketse, Qostanaı qalasynyń shetinde ornalasqan 400-den astam turǵyn úı sý astynda qalýy múmkin. Osyny eskergen oblystyq tótenshe jaǵdaı qyzmeti men jergilikti atqarýshy organdar erterek qamdanyp, qaýiptiń aldyn alýǵa kirisip ketti.
Tasqynǵa tosqyn jasaý úshin ótip jatqan bir aılyq is-sharalar barysynda qar qalyń túsken Tobyl ózeniniń jaǵalaýyna jaqyn saıly jerlerdegi úılerdiń mańaıy barlanyp, aryq kózderin arshý jumystary júrgizilýde.
Qyzyl sýdan qaýip tónip turǵan Tobolskaıa, Pıonerskaıa, Krasnyı kýznes, Iýnyı boes, Dachnaıa sııaqty ataýy eskirip ketken kósheler men Drýjba aýylyndaǵy, sondaı-aq «Tekstılshık» saıabaǵyndaǵy jeke turǵyn úılerde 1,5 myńnan astam adam turyp jatyr. Munyń syrtynda, jer astyndaǵy sýdyń deńgeıi kóterilse, 2-Qostanaı shaǵyn aýdanyndaǵy úılerdiń astynan da sý shyǵýy ábden múmkin.
Bir aılyq qaýipsizdik sharalaryna volonterler de tartylyp, qaýipti shaǵyn aýdandardaǵy túrli kásiporyndarǵa da kún saıyn reıd júrgizilip jatyr.
– Qazir merdiger mekemelerdiń sý soratyn tehnıkalarynyń daıyndyǵy men ınertti materıaldarynyń jetkilikti ekendigine kóz jetkizý maqsatynda tekserý júrip jatyr. Qar shyǵarýǵa arnalǵan polıgondardyń jaǵdaıy, gıdrotehnıkalyq qurylystardyń jaramdylyǵy tekseriledi. Bıyl sý basý qaýpi asa joǵary emes, degenmen jaǵdaıdy aldyn ala baqylap, qaýipsizdik sharalaryn erterek qamdap qoımasa bolmaıdy, – dedi qala ákimdigine qarasty azamattyq qorǵanys bóliminiń ınspektory Qanat Qaıybjanov.
Bólim ınspektorynyń aıtýynsha, Qostanaı kóktemgi sý tasqynyna daıyn. Qyzyl sýǵa qarsy sharalarǵa jumyldyrylatyn merdiger mekemeler búginge deıin 1 600 tonna ınertti materıal, 6 500 qum toltyrylǵan qap jáne 7,3 tonna janarmaı daıyndap qoıǵan. Qostanaıdyń syrtyndaǵy polıgondarǵa 350 myń tekshe metr qar shyǵarylǵan.
Sonymen qatar qalanyń ońtústigindegi 7, 8, 9-shaǵyn aýdandardaǵy, 2-Qostanaıdaǵy, Batys, Aeroport shaǵyn aýdandaryndaǵy jáne qala shetindegi óndiristik kásiporyndardyń mańaıy men Drýjba aýylyndaǵy sý arnalaryn tazartý jumystary qyzyp jatyr.
– Sý tasqyny kezeńi bastalǵansha uzyndyǵy 95 shaqyrym bolatyn 335 sý arnasy men kárizder tazartylady. Kóktemgi sý tasqynyna daıyndyq áli de jalǵasatyn bolady, – dedi Qostanaı qalalyq TJB bastyǵy, azamattyq qorǵanys polkovnıgi Almas Tólendın.
«Qazgıdromet» RMK oblystyq fılıalynyń málimeti boıynsha, bıyl óńirdegi qar qabatynyń qalyńdyǵy 28 sm bolady. Mamandar qardyń quramyndaǵy sý mólsheri 85 mm ekenin anyqtap otyr.
QOSTANAI