Keshe Astanada Eýropa fýtbol qaýymdastyǵynyń (ÝEFA) kezekti XXXVIII kongresi ótti.
Oǵan Premer-Mınıstr Serik Ahmetov, FIFA basshysy Iozef Blatter, ÝEFA prezıdenti Mıshel Platını men Eýropa elderiniń fýtbol federasııalarynyń ókilderi qatysty. Jıyndy Úkimet basshysy ashyp, sóz sóıledi. Ol ÝEFA kongresiniń TMD elderi arasynda alǵash ret Qazaqstanda ótkizilip jatqanyn, bizdiń elimiz atalǵan uıymǵa bertinde ǵana qosylǵanyna qaramastan, qazirdiń ózinde onyń jumysyna belsene aralasýǵa daıyn ekenin aıtty.
Kelesi kezekte Qazaqstan fýtbol federasııasynyń prezıdenti Ádilbek Jaqsybekov sóz alyp, elimizde mıllıondaǵan adamnyń súıikti oıynyna aınalǵan fýtboldyń damý deńgeıine, sońǵy kezderi elimizdiń túkpir-túkpirinde balalar men jasóspirimder, jastar fýtbolyna basa mán berilip otyrǵanyna den qoıyp, qazaq fýtbolynyń damýyna ÝEFA-nyń úlken úles qosqanyn atap ótti. Osy jerde ol eýropalyq fýtbol qaýymdastyǵynyń mamandarynyń qatysýymen onǵa jýyq semınardyń ótkenin, osynyń ózi bizdiń el úshin materıaldyq jáne metodologııalyq ádisteme turǵysynan kómek bolǵanyn jetkizdi.
Osydan keıin Á.Jaqsybekov ÝEFA-men baılanys odan ári jalǵasa beretinin, óıtkeni, atalǵan uıymnyń talaptarynyń arqasynda stadıondardy qaıta jóndeý, fýtboldy buqaralyq sportqa aınaldyrý sııaqty jumystardyń júrgizilgenin aıtty. Sonymen birge, ol Qazaqstan Fýtbol federasııasy Italııa, Germanııa, Ispanııa sekildi Eýropanyń fýtboly damyǵan elderimen memorandým jasap, kelissózder júrgizgeninen de habardar etti. «Osynyń bári Qazaqstan fýtbolynyń Eýropamen tyǵyz qarym-qatynas ornatyp, jańa qarqyn alýyna jasalyp jatqan sharalar», dedi ol.
Kongreste qurmetti qonaq retinde shaqyrylǵan FIFA prezıdenti Iozef Blatter de qazaq fýtbolyna qatysty óz oıyn bildirdi. Ol aldymen Qazaqstan bıliginiń fýtbolǵa degen kózqarasynyń jaqsy ekenine taǵy da kóz jetkizgenin, qazaq fýtbolyna 100 jyl degenimizdiń ózi úlken oqıǵa ekenin, endi aldaǵy ýaqytta ÝEFA men Qazaqstan federasııasy birigip jumys isteýdi odan ári jalǵastyra beretinin málimdedi. Jıynda onyń bul sózin ÝEFA prezıdenti Mıshel Platını qoldaıtynyn jetkizdi.
– Qazaqstan – keremet el, Astana – jas ári ádemi qala. Biz bolashaqta osyndaı ǵajap elmen baılanysymyzdy ári qaraı jalǵastyratyn bolamyz. 60 jyl buryn ÝEFA qurylǵan kezde onyń XXXVIII kezekti otyrysy Qazaqstan atty keremet elde jáne jas ári arý Astanada ótedi dep kim oılaǵan? – dedi ol.
Endi kongrestiń ózine kelsek, onda fýtboldy damytýǵa baılanysty birneshe másele qaraldy. Atap aıtqanda, ÝEFA bastamasymen balalar qory quryldy. M.Platınıdiń aıtýynsha, ol ulttyq qaýymdastyqtar arqyly jergilikti talantty balalardy jattyqtyrýǵa arnalady. «Aldyńǵy kúni ÝEFA-nyń atqarýshy komıteti atalǵan qordy qurý týraly qujatqa qol qoıdy. Endi biz ony iske asyrýǵa atsalysatyn bolamyz», dedi ÝEFA prezıdenti. Sonymen birge, ol atalǵan qordyń tek Eýropada emes, jer júziniń basqa da elderinde muqtaj balalardy qarjylandyrý baǵdarlamalarymen aınalysatynyn atap kórsetti.
Kongreste boıkot máselesi de sóz boldy. Bul týraly M.Platını qazirgi kezde kóptegen elder saıası jaǵdaıǵa baılanysty ózderine unamaǵan memleketterge boıkot jarııalaýǵa daıyn turatynyn, eger boıkot jasaǵysy kelse, ekonomıkalyq sanksııalar, basqa da joldar arqyly boıkot jasaýǵa bolatynyn, al biraq ta onyń sportqa eshqandaı qatysy bolmaýy kerektigin málimdedi.
Keshegi jıynda, sondaı-aq, «Ulttar lıgasy» jobasy maquldandy. Bul lıga 2018 jylǵy álem chempıonatynan keıin qoldanysqa enedi. Qazaqstan Fýtbol federasııasynyń habarlaýynsha, atalǵan joba ulttyq quramalar arasyndaǵy joldastyq kezdesýdi almastyrýy múmkin. Ázirshe týrnırge 4 topqa bólingen 16 komanda qatysady degen derek qana bar. Bul ıdeıany kongreste 54 eldiń ókilderi biraýyzdan qoldady.
Dastan KENJALIN,
«Egemen Qazaqstan».