Túrkııa Birikken Arab Ámirlikterine túrik mafııasynyń kóshbasshysy Sedat Pekerdi repatrıasııa jasaý boıynsha ótinish jiberdi. Oǵan Interpol qyzyl eskertý bergen bolatyn.
Túrkııa Ádilet mınıstrligi 1 aqpanda halyqaralyq uıym atalǵan eskertý boıynsha qarar qabyldaǵannan keıin osyndaı qadamǵa barǵan.
Elý jasqa kelgen Peker 90-jyldardyń sońynda tanymaldylyqqa ıe boldy. 2007 jyly birqatar qylmystyq top qurǵany úshin 14 jylǵa bas bostandyǵynan aıyrylǵan. Ol osydan birneshe jyl buryn ǵana bostandyqqa shyqty.
Túrkııa bıligi byltyr sáýirde Pekerge qatysty tergeýdi qaıta bastaǵan-dy. Al Pekerdiń ózi YouTube platformasynda kanal ashyp, vıdeo jarııalap, mıllıondaǵan qaralym jınady. Vıdeolarynda Sedat Peker «laýazymdy tulǵalardyń jumysyna qatysty pikir bildirip, olardyń qylmystaryn áshkereleımin», deıdi. Beıne kórinister BAÁ-de túsirilgen.
Pekerdi Dýbaı polısııalary tergeýge alyp, alaıda keıinnen bosatty. Sodan beri kanalynda beıne jazba jarııalamady. Pekerdiń ózi Dýbaı polısııasy ázirge esh vıdeo túsirmeýin surady deıdi. Onyń basqa jelilerdegi belsendiligi de toqtady.