Qanatty qapy qaldyrdy

Boks keshine deıin birqa­tar boks mamany bul aıqas­tyń negizi favorıti retinde qazaqstandyq boksshyny ata­ǵan bolatyn. О́ıt­keni jerle­simiz tájirıbe ja­ǵynan da, sta­tıstıkalyq ná­tı­je boıynsha da qarsylasyna qara­ǵanda bir bas joǵary edi. 29 jastaǵy Djımmı osy kúnge deıin kásibı sharshy alańda 27 kezdesý ótkizip, 25 márte jeńiske jetken. 10 qar­sylasyn nokaýtqa jiberse, ózi eki márte jeńilistiń kermek dámin tatqan. Ulybrıtanııa boks­shysynyń 2015 jyldyń jel­toqsan aıynda WBO nusqasy bo­ıynsha álem chempıony atanýǵa tama­sha múmkindigi boldy. Alaıda óziniń otandasy Lıam Smıtpen bolǵan jekpe-jektiń jetinshi raýndynda tehnıkalyq nokaýt­pen utyldy. 2018 jyldyń jel­toqsanynda ırlandııalyq Dennıs Hoganmen judyryqtasyp, qar­sylasynan upaı sany boıynsha jeńilip qaldy. О́ziniń sońǵy básekesin Kellı osy jyldyń 12 jeltoqsanynda Garrı Mettıýsqa qarsy ótkizip, ony úshinshi raýndta uryp jyqty.

Iá, aıqasqa deıin brıtanııalyq boksshyda az ǵana basymdyq bar edi. Sebebi ol Qanat Islamǵa qaraǵanda úsh aı buryn jekpe-jekke shyǵyp, óz babyn joǵalta qoımaǵan bolatyn. Al otandasymyz eń keıingi jekpe-jegin bir jyl buryn, ıaǵnı 2021 jyldyń 20 aqpanynda ótkizgen. Bir jyl boıy sharshy alańǵa shyqpaǵan otandasymyzǵa rıngte ózin erkin sezinýi qıyn boldy.

Plant-Sıtıdegi jekpe-jektiń alǵashqy úsh mınýtynda-aq Kellı statıstıkadaǵy basymdyq árdaıym shyndyqqa sáıkes kele bermeıtinin dáleldep berdi. Gong belgisi soǵyla salyp, alǵa qa­raı umtylǵan brıtanııalyqtyń Qanatqa qaraǵanda jeńiske degen qushtarlyǵy, rıngte ózin erkin ustap, shıraq qımyldaýy bizdi sekemdendirip qoıdy. Tipti úshinshi raýndta Kellı otandasymyzdy tópelep soqqynyń astyna alyp, bar máseleni osy sátte-aq sheship tastaýdy kózdep edi. Alaıda Qanat tájirıbesiniń arqasynda bul sátten ońaı sytylyp shyqty. Al tórtinshi raýndta eki boksshy da abaısyzda bir-birimen soqtyǵysyp, qabaqtaryn jaryp aldy. Biraq tóreshi jekpe-jekti jalǵastyrýǵa pármen berdi. Eger aıqas jaraqatqa baı­lanys­ty tórtinshi raýndta aıaq­talǵanda Djımmıdiń jeńiske je­týi kú­­mánsiz edi. О́ıtkeni Kel­lı tóre­shiler esebi boıynsha alda turǵan edi. Áıtkenmen kezdesý tolyq 10 raýndqa jalǵasyp, jeńim­pazdyń esimin báribir tóre­shiler anyqtady. Birinshi tóreshi jekpe-jek teń aıaqtaldy dep eseptese (97:97), qalǵan eki tóreshi 96:94 jáne 97:93 esebimen jeńisti brı­tanııalyq boksshyǵa berdi.

Osylaısha, 2012 jyldan beri kásipqoı boksta óner kór­setip, birde-bir jekpe-jeginde jeńil­megen boksshymyz alǵash ret je­ńilistiń kermek dámin tatty. Qanat Islamnyń burynǵy qarqynyn joǵaltyp alǵanyn keıingi jekpe-jekterinen baı­qaýǵa bolady. Ol bul joly da qarsylasyna esh tegeýrin kórsete almady. Burynǵydaı joıqyn soqqylaryn da baıqaı almadyq. Muny qarsylasy da aıtyp otyr.

– Ár raýndta basym tústim dep oılaımyn. Jekpe-jektiń bel ortasynan asqanda qolymdy jaraqattap aldym, sondyqtan keıingi tórt raýnd tek djeb qana jasaı aldym. Men onyń qysym jasaǵanyn sezgenimmen, kúshin sezbedim. Qanat jekpe-jekti ba­qylaýǵa alǵysy keldi, biraq men oǵan josparyn iske asyrýǵa múm­kindik bermedim, – dedi Kellı jek­pe-jekten soń.

О́kinishke qaraı, pandemııadan keıin kásipqoı boksta júrgen qazaqstandyq boksshylardy ne qyrsyq shalǵany belgisiz, áıteýir jer­lesterimizdiń joly bolar emes. Endi, mine, bul qatarǵa Qanat Islam da qosyldy.