L.Tolstoı atyndaǵy oblystyq kitaphanada «Dostyǵy jarasqan el – Qazaqstan» dep atalatyn halyq óneriniń kórmesi ashyldy. Kórme qolóner jáne kitap qory atty eki bólimnen turady.
Sharanyń ashylý rásiminde sóılegender halyqtyq muranyń saqtalý máselesi tóńireginde oı qozǵap, jastardyń mádenı bilimin jetildirýdiń mańyzyna toqtaldy.
– Byltyr Memleket basshysy 2022 jyl TMD elderiniń mádenı murasy men halyq óneri jyly bolady degeni esterińizde bolar. Qazaqstannyń, jalpy TMD elderiniń tarıhynda halyqtyq ónerdiń orny erekshe. Qazirgi tehnologııa damyǵan zamanda, ásirese jastar jaǵy halyqtyq ónerdiń qaınar kózderinen sýsyndap ósýi kerek, – dedi A.Baıtursynuly atyndaǵy QО́Ý professory Dmıtrı Legkıı.
Kórmege Qostanaı óńirinde ómir súrip jatqan 17 etnostyń mádenıeti men óner tarıhynan keń maǵlumat beretin qundy kitaptar qoıylǵan. Olardyń birazy qostanaılyq qalamger Svetlana Petrovanyń jeke kitaphanasynan ákelinipti.
– Men jeke kolleksııamnan alynǵan kitaptardyń ishindegi eń qundysy – 1975 jyly jaryq kórgen «Qyz Jibek» jyry. Bul – máńgilik mahabbat dastany. Odan keıingi kitabym halyqtar dostyǵyn dáripteıdi. Bul taqyryp búgingi tańdaǵy eń ózekti taqyryp dep sanaımyn, – dedi kitaptardyń ıesi.
Atalǵan kórme jyl sońyna deıin jumys isteıtin bolady. Kitaphana ujymy jazǵa qaraı dostyq kórmesiniń kóshpeli túrin uıymdastyryp, oblys aýdandaryn aralap shyǵýdy josparlap otyr.
QOSTANAI