Meıirim merekesi

Qolyndaǵy baryn bólisip, jarym kóńil jandardyń jańa mekenge sińisip ketýine sep bolypty. Bul sonaý qıyrdan kelip, qazaq jerine qonys tepkenderdiń búgingi urpaǵy máńgi umytpaıtyn tarıh.

Jergilikti halyqpen bite qaınasyp, el baqytyn birge qalasqan sol atalarymyz ózinen keıingilerge qıyn kezde qanatynyń astyna alǵan halyqty, ortaq Otanymyz – Qazaqstandy qurmet­teýdi tabystapty. Bizdiń birligimizdiń qazyǵy osylaı qaǵylǵan. 

Men dúnıege kelgen Aqmaıa aýylynda kóptegen etnos ókilderi tatý-tátti ǵumyr keship otyr. Osy aýyldaǵy qazaq mektebinde bilim aldym. Mektepte oqyp júrgen kezimnen «Abaı oqýlaryna» qatysyp, álemdik aqyl-oıdyń shyńyna jetken dananyń 200-ge jýyq óleńin jattadym. Odan bólek, bir poemasyn bastan-aıaq aıta alamyn. Osylaısha uly oıshyldyń izgilikke salǵan rýhanı joly túrli ulttardy bir-birine jaqyndastyra túskenine kózim jetti. Qazir Qorqyt ata atyndaǵy Qyzylorda ýnıversıtetinde qazaq tili men ádebıeti mamandyǵy bo­ıynsha bilim alyp jatyrmyn.

Búginde jalpyhalyqtyq mereke­ge aınalǵan Alǵys aıtý kúni – bizdiń or­taq tarıhymyzdyń sımvoly. Qazaq­stan qutty qonysyna aınalǵan túrli etnostardyń mıllıondaǵan ókilderiniń qazaq halqyna tereń taǵzymynyń belgisi. Bastaryna túsken aýyrpalyqty qaıyspaı birge kótere bilgen jurtqa degen júrekjardy rızashylyǵy. Meıirim merekesine aınalǵan ataýly kún keshegige degen qurmet qana emes, birtutas eldiń erteńine senimniń aıǵaǵy. «Keń bolsań, kem bolmaısyń» degen taǵylymdy támsildi ustanatyn qazaq ultyna alǵys aıtý, keshegi qıyndyqty kózimen kórgen aldyńǵy býynnyń bizge degen amanaty. Bul kúni biz babalarymyzdy rızashylyqpen eske alamyz, ata-analarymyzǵa, muǵalimderimizge, dostarymyzǵa, sońǵy jyldary in­det­pen kúresip, myńdaǵan jandy ajal tyrnaǵynan arashalap jatqan dári­gerlerge alǵys aıtamyz.

Elena PAK,

Qorqyt ata atyndaǵy Qyzylorda memlekettik ýnıversıtetiniń 4-kýrs stýdenti