Atyraý oblystyq perınataldyq ortalyq dırektorynyń mindetin atqarýshy Q.Ermaǵambetovtiń málimetinshe, osy kezge deıin áleýmettik medısınalyq saqtandyrý arqyly 224 operasııa jasalǵan. Onyń ishinde 124 josparly, 100 shuǵyl ota bar.
– Shuǵyl otanyń biri júktiliktiń 32-aptasyn ótkerip júrgen áıelge jasaldy. Ol ortalyqqa 25 qańtarda túsken edi. Sol kezde onyń jaǵdaıy aýyr boldy. Oǵan «Aýyr dárejeli preeklampsııa. Idıopatııalyq trombosıtopenııalyq pýrpýra. Anemııanyń aýyr dárejesi» dıagnozy qoıyldy. Sol sebepten, jansaqtaý bólimshesine jatqyzyldy. Júkti áıeldiń jaǵdaıynyń aýyrlyǵyna baılanysty №1 oblystyq aýrýhananyń mamandarymen konsılıým ótkizdik. Keıin ony elordadaǵy «Ana men bala ǵylymı ortalyǵyna» jetkizý týraly sheshim qabyldandy. Alaıda odan koronavırýs ınfeksııasynyń belgisi anyqtalyp, oblystyq perınataldyq ortalyqta shuǵyl ota jasaldy, – deıdi Q.Ermaǵambetov.
О́mirge salmaǵy 1 kılo 940 gr, boıy 45 sm burymdy kelgen. Nárestege bastapqyda ortalyqtyń jansaqtaý bóliminde em-dom kórsetilipti.
– Keıin sábıden de qaýipti vırýstyń belgisi tabyldy. Jaǵdaıy turaqtanǵannan keıin №2 oblystyq aýrýhanada em qabyldady. Sodan soń úıine shyǵaryldy. Oblystyq perzenthananyń mamandary kúrdeli otany sátti jasap, ana men balanyń ómirin saqtap qaldy, – deıdi Q.Ermaǵambetov.
Atyraý oblysy