Qysqy jol qashanda qaýipti. Jar basyna jasyrǵanyń jarlaýyttyń astynan syǵalaǵandaı kórinip turady. О́ńirdegi avtojoldardan 64 túrli keleńsizdiktiń beti ashylǵan.
Bizdiń óńirde ádette atan túıeni alyp jyǵatyn aq boran, úskirik aıaz jıi bolatyn. Bıyl qys qaharyna mine qoıǵan joq. Sonyń ózinde kúre joldardyń boıyn taý-teńiz qar basyp, ókpek jolaýshynyń ókpesin óshirip tur. Qys boıy júzdegen kólik aq borannyń tutqynynda qalyp, talaı jolaýshy qutqaryldy. Jol-kólik oqıǵasy da oryn alýda. Osynyń barlyǵy jol boıyndaǵy jónsizdikten. Keı tusta jol siltep, baǵyt baǵamdatar belgi de joq, barynyń ózin daýyl julmalap, jaramsyz etip tastaǵan. Qaısybiri qarǵanyń synǵan qanatyndaı bolyp qalqıyp tur.
Jyl basynan beri kúre joldardyń boıyna 18 márte ınspeksııalyq reıd júrgizildi. Jolaýshynyń qamy. Qar basqan jolda qańtarylyp qalý kimge bolsyn ońaı emes. Birinshi qıyndyq – kólik óte almaıtyn kúresinniń kóptigi. О́ńir joldarynda 227 jerde qar tolyp qalatyn ýchaskeler bar eken. Áýel basta, jol qurylysyn júrgizgen kezde jeldiń baǵytyn, tabıǵattyń ereksheligin eskerý kerek edi. Qar túsken saıyn qarbalas ta kóbeımek. Qaýip kóbeıgen soń Kókshetaý – Shýche, Kókshetaý – Omby baǵyttaryndaǵy tas joldyń boıyn baqylaý jıi júrgiziledi.
– Birqatar kemshilik anyqtalyp otyr, – deıdi jol aktıvteri ulttyq sapa ortalyǵy oblystyq fılıalynyń ınjeneri Igor Stefan, – merdiger uıymdarǵa uıǵarylymdar jiberildi. Eger kemshilikter ýaqtyly joıylmasa, tıisti shara qabyldaý úshin oblystyq polısııa departamentine de habar joldaımyz.
Qysqy joldyń qaýpi týraly jolaýshylarǵa eskertý az aıtylyp jatqan joq. Bul oraıda bar múmkindik tegis paıdalanylýda.
– Eń aldymen adamdardyń aman bolǵany kerek. Qysqy joldy kútip ustaý, qasat qardyń qursaýynan tazalaý az sharýa emes, – deıdi Aqmola – adaldyq alany jobalyq keńsesiniń jetekshisi Samıra Táıtenova, – turǵyndar tarapynan túsken aryz-shaǵym ýaqytynda tekseriledi. El eskertýine nazar aýdarý arqyly tótenshe oqıǵalar oryn alǵan joq.
Kóktem de kelip qaldy. Qar qursaýynan qutylǵanymyzben, keıbir jol boıyn oryp ketetin qyzyl sýdyń da qaýip tóndiretindigin qaperden shyǵarmaǵanymyz jón. Saqtyq sharalaryn buljytpaı oryndaǵanda ǵana jolaýshynyń joly bolmaq.
Aqmola oblysy