Ýkraınadaǵy ahýal kúnnen-kúnge nasharlaý ústinde. Urys barysy da ózgeriske ushyrady. Buǵan deıin Reseı áskeri aýyr tehnıkalarmen qalalardy basyp alýǵa tyrysqan. Alaıda bul jospar júzege aspaǵannan keıin Ýkraınanyń iri qalalaryn zymyrandarmen atqylap jatyr.
Reseı prezıdentiniń baspasóz hatshysy Dmıtrıı Peskov áýe soqqylary qarapaıym turǵyndarǵa baǵyttalǵany týraly aqparat ótirik dep aıtty. Degenmen, áleýmettik jelilerdegi vıdeolarda Ýkraına qalalaryna ruqsat etilmegen vakýmdyq jáne kassetalyq bombalarmen, qanatty zymyrandarmen atqylap jatqany baıqalady. Máselen, vıdeolardyń birinde Harkovtyń dál ortasyna túsken zymyrannyń kóp dúnıeni búldirgeni anyq kórinedi. Sondaı-aq qarapaıym turǵyndardyń úıiniń qırandylary da jıi jarııalanyp jatyr.
Birikken Ulttar Uıymynyń adam quqyqtary jónindegi keńsesiniń (OHCHR) málimetine súıensek, ótken aptada Reseı áskeri Ýkraınaǵa basyp kirgennen beri keminde 136 beıbit turǵyn qaza tapqan. Sonyń ishinde 13 bala bar. Shamamen 400-ge jýyq adam jaralandy.
OHCHR baspasóz hatshysy Lız Trossell qaza tapqandardyń kópshiligi Ýkraınanyń shyǵysyndaǵy Donesk jáne Lýgansk oblystarynyń turǵyndary ekenin jetkizdi. Alaıda shyǵyn budan áldeqaıda kóp bolýy múmkin.
Ulybrıtanııa barlaý qyzmeti taratqan derekterge súıensek, basqynshy áskerdiń Kıevke qaraı jyljýy baıaýlap qalǵan. Sondyqtan el astanasyn artıllerııamen atqylap jatyr. Ýkraınanyń ońtústigindegi Herson qalasynyń meri shahardy reseılik sarbazdar qorshap alǵanyn habarlady.
NATO basshysy Iens Stoltenberg Reseıdi Ýkraınadaǵy soǵysty toqtatyp, barlyq kúshterin shyǵarýǵa shaqyrdy. Sonymen qatar alıans Kıevti qoldaý maqsatynda ásker nemese áskerı ushaq jibermeıtinin jetkizdi.
«NATO – qorǵanysqa arnalǵan odaq. Biz Reseımen qaqtyǵysqymyz kelmeıdi. Reseıden dereý soǵysty toqtatyp, Ýkraınadan barlyq kúshterin shyǵaryp, máseleni dıplomatııalyq jolmen sheshýge shaqyramyz», dedi Iens Stoltenberg.
Ulybrıtanııa premer-mınıstri Borıs Djonson «Eýropa qurlyǵy apatqa tap boldy» dep málimdedi. Varshavaǵa barǵan saparynda ol Polsha úkimeti men halqy gýmanıtarlyq daǵdarysty sheshýge mol úles qosyp jatqanyna toqtaldy.
Osy oraıda Ulybrıtanııada konservatorlar men oppozısııalyq depýtattar Úkimetti qysymǵa alyp, ýkraın bosqyndaryn qabyldaýǵa kirisýdi talap etti. Premer-mınıstr sondaı-aq Ýkraına prezıdenti Volodımır Zelenskııdiń «kóshbasshylyǵy men erligine» qurmet kórsetetinin atap ótti.
Eýropalyq parlamentte Ýkraınadaǵy ahýalǵa baılanysty tyńdalym ótip, atalǵan eldiń prezıdenti Volodımır Zelenskıı beıne-rejimde qatysty. Depýtattar basqynshylarmen kúreste erik-jiger kórsetip jatqan Zelenskııge bir mınýt boıy tik turyp, qol shapalaqtap qurmet kórsetti. «Búgin sizderge qaıyrly tań, qaıyrly kún nemese qaıyrly kesh dep aıta almaımyn. Sebebi keı adamdar úshin ár kún qaıyrly bolyp jatqan joq. Keıbiri úshin bul kún aqyrǵy kúnge aınaldy», dedi ol.
Sondaı-aq Zelenskıı Reseıdiń tek áskerı nysandarǵa shabýyl jasaımyz degen málimdemesin joqqa shyǵardy. «16 balany óltirdiń. Qaı áskerı bazada balalar bar? Qaı bala tank aıdap júr eken?», dedi ol.
Dúısenbi kúni Ýkraına basshylyǵy Eýropalyq odaqqa ený týraly ótinish jasady. Uıym atalǵan eldi quramyna engizý prosesi jedel júretinin, qazirgi tańda ony qarastyryp jatqanyn atap ótti. EO-ǵa múshe birqatar memleket bul usynysty qoldaıtynyn málimdedi.
Sonymen qatar Eýropalyq parlament uıymnyń Reseıdiń munaıy men gazyn ımporttaýdy shekteýge shaqyrdy. Depýtattar Kremldiń basqynshy qadamyna qarsy jaýap retinde qatań sanksııalar engizýdi talap etip otyr. Qujatta Eýropalyq odaqtyń porttaryna Reseıge baratyn kemelerdi kirgizýden bas tartý jóninde aıtylǵan.
Maxar kompanııasy spýtnıkten túsirilgen sýretterge súıene otyryp, Kıevke soltústik-batys baǵytta shamamen 64 shaqyrymǵa sozylǵan Reseıdiń áskerı kolonnasy kele jatqanyn habarlady.
Reseıge sanksııa salǵandar sany kúnnen-kúnge artyp barady. Tipti saıasatqa qatysy joq kompanııalar da aýylyn alys qondyrýdy jón sanady. Máselen, Disney kompanııasy Batman fılmin Reseıde kórsetýden bas tartty. Mastercard kompanııasy eldegi birqatar qarjy ınstıtýtynyń jumysyna tyıym salynǵanyn habarlady.