Tennısten Qazaqstan ulttyq quramasy keıingi jyldary jańa formattaǵy Devıs kýbogynyń fınaldyq básekesinde únemi óner kórsetip kele jatqany belgili. Jerlesterimiz bıyl da bas júlde úshin ótetin básekeden úmitti. Ol úshin Aleksandr Býblık pen Mıhaıl Kýkýshkın bastaǵan jerlesterimiz osy aptadaǵy jarystyń irikteý kezeńinde Norvegııa quramasyn jeńýi tıis.
Qazaqstan men Norvegııa arasyndaǵy sheshýshi synǵa joldama beretin irikteý básekesi 4-5 naýryz kúnderi Norvegııanyń bas shahary – Oslodaǵy Oslo Tennisarena sport kesheninde ótedi. Bul synda el namysyn Mıhaıl Kýkýshkın, Andreı Golýbev, Aleksandr Nedovesov, Dmıtrıı Popko jáne Qazaqstannyń birinshi raketkasy Aleksandr Býblık qorǵaıdy. Qazaqstandyq tennısshiler Devıs kýbogy aıasynda norvegııalyqtarmen tuńǵysh ret kezdespek. Jarys erejesi boıynsha quramalar tórt jekeleı synda jáne bir juptyq matchta baq synaıdy. Ár oıyn úsh setke deıin sozylady. Jeńimpaz qurama osy jyldyń qyrkúıek aıynda ótetin Devıs kýbogynyń fınaldyq kezeńine (komandalyq álem chempıonatyna) joldama alady.
«Oslodaǵy oıynǵa tolyq daıynbyz. Hard tósenishi eki komandaǵa da qolaıly dep oılaımyn. Komandamyzben oıynǵa tyńǵylyqty daıyndalyp jatyrmyz. Quramadaǵy jigitter Norvegııamen oıynǵa naǵyz babynda keldi. Eshkimde jaraqat joq. Jeńiske jetip, jankúıerlerimizdi qýantamyz degen úmittemin», dedi Mıhaıl Kýkýshkın.
Norvegııa quramasy qazirgi tańda Devıs kýbogynyń reıtınginde 39-oryndy ıelenýde. Skandınavııa eliniń ókilderi 2019 jyldan beri jańa formattaǵy týrnırdiń áli kúnge deıin fınalǵa joldama ala almaı keledi. Degenmen olar búginge deıingi eń úzdik nátıjesine sonaý 1995 jyly qol jetkizgen. Sol jyly uıymdastyrylǵan tennısten Álemdik kezeńniń básekesinde Norvegııa pleı-off satysyna deıin jetken bolatyn. Sondaı-aq Norvegııa Devıs kýbogyna 1928 jyldan beri qatysyp keledi.
Qazirgi tańda Norvegııa quramasynyń kóshbasshysy – 23 jastaǵy Kasper Rýýd. Kezinde Kasperdiń ákesi de, atasy da tennıspen kásibı túrde aınalysyp, birtalaı jetistikke qol jetkizgen. Rýýd bul kúnderi erler arasyndaǵy jańarǵan álemdik reıtıngte 8-orynda tur. Ol osy kúnge deıin ATR týrnırindegi jeti jarystyń bas júldesin jeńip alǵan.
Norvegııa quramasynyń ekinshi raketkasy sanalatyn 24 jastaǵy Vıktor Dýrasovıch álemdik reıtıngte 326-orynǵa jaıǵasqan. Sondaı-aq vıkıngter eliniń quramynda 21 jastaǵy Lýkas Hellým Lıllengen (álemdik reıtıngte 1302-orynda tur), 20 jastaǵy German Hoıeral jáne 22 jastaǵy Sımen Sýnde Bratholm bar. Qurama kapıtany – Anders Haset.
Oıyndar kestesi: 4 naýryz kúni eki jekeleı kezdesý ótedi. Matchtar elorda ýaqyty boıynsha 23.00-de bastalady. 5 naýryzda tennısshiler jekeleı jáne juptyq synda sheberlik baıqasady. Bul oıynnyń ýaqyty 19.00-ge josparlanǵan.