Kenshiler astanasynyń irgesindegi Ýzenka eldi mekeninde jylyjaılar qysy-jazy jumys isteıdi. Bul jerde jaıqalyp qyzǵaldaqtar ósedi. Budan bólek, jergilikti florıster-gúl ósirýshiler biraz ýaqyttan beri alstromerııany, ıaǵnı Perý lalagúliniń tuqymyn kóbeıtýdi de qolǵa alǵan.
– Alstromerııa – óte ádemi gúl. Bir kórgennen ósirsem degen qulshynys paıda boldy. Tuqymyn Gollandııadan tapsyryspen aldyryp, mine, ekinshi jyl boldy, jylyjaıda ósirip jatyrmyz. Bul ońaı sharýa emes: kúndiz-túni belgili bir temperatýrany – 14-16 gradýs jylý deńgeıin ustap turý kerek. Kún kóziniń kóp túspeýin qadaǵalap, qajet bolǵan kezde kóleńkeleımiz. Eger tym ystyq bolsa, búrshikter qýrap ketedi. Sýdy da mólsherden tys quıýǵa bolmaıdy. Tamshylatyp sýaramyz, – deıdi kásiporyn basshysy Ramıs Aqberdıev.
Alstromerııa – Latyn Amerıkasynyń tropıktik tabıǵatynda ósetin názik gúl. Jaqsy kútim bolsa, sabaǵynyń uzyndyǵy bir jarym metr bıiktikke jetetin kórinedi. Tústeri aq, qyzǵylt, qyzǵylt sary, órik tústes, qyzyl, túrli-tústi bolyp keledi eken.
Jalpy, Aqberdıevter otbasy bul kásippen 20 jyldan beri aınalysyp keledi. Olardyń gúl ósiretin jylyjaılary 35 sotyq alqapty alyp jatyr. Bul jerlerde golland qyzǵaldaqtarynyń jıyrmaǵa jýyq túri ósedi eken. Sonymen birge narsıster de qulpyryp turady.
Ramıs Aqberdıev klımaty qytymyr Arqa óńiri úshin gúl bıznesiniń qymbatqa túsetinin aıtady. Máselen, qysta jylyjaılardy jylytý úshin shamamen 300 tonna kómir saqtaýǵa týra keledi eken.
Aqberdıevterdiń kásibi áıelder qaýymynyń merekesi – 8 naýryzǵa qarsy qyza túsedi. Jylyjaılardaǵy alýan túrli gúl arýlar men áıelderge arnalǵan syılyqtarǵa qosa syıǵa tartatyn gúl shoqtaryna aınalady. Jáne olar tek Qaraǵandynyń ǵana emes, elordanyń da saýda núktelerine jol tartady.
Qaraǵandy oblysy