Qysqy maýsym qaýip-qaterge toly. Ásirese, órt. О́ńirde eki kúnniń birinde oqys oqıǵalar oryn alyp jatady. Materıaldyq shyǵyn óz aldyna, aıtpaı kelgen apat turǵyndardyń da ómirin jalmaýda.
Dál osyndaı qıyn-qystaýda adam ómirin qorǵap qalǵan azamattardyń erlikke para-par is-qımyldary jerine jetkizile, jas urpaqtyń sanasyna sińirile ashylyp aıtylǵany durys. О́zgege – ónege, keıingige – jaqsy mysal. Taıaýda Shýchınsk qalasyndaǵy jekemenshik úılerdiń birin oılamaǵan jerden qyzyl jalyn sharpydy. Ázirge tilsiz jaýdyń qalaı oryn alǵany belgisiz. Mamandar anyqtaý ústinde. Osy arada álde elektr jelileriniń tozyǵy jetkendikten be, bálkim úı ıeleriniń beıqamdyǵynan ba, órttiń jıi oryn alatynyn aıta ketkenimiz lázim. Beıqamdyq beınetke bastaıdy. Dúnıe-múlik sadaqa, shıetteı balalar shyryldap qurban bolyp jatsa, qasireti esten ketpeıdi ǵoı. Bul joly órtke oranǵan úıdiń ishinde eki bala bolǵan. Qyzyl jalyn shaǵyn úıdi birden qushaǵyna alyp, qoıý tútin kóz ashtyrmastaı qaýlaǵan eken. Áskerı qyzmetker Rýslan Ánýarbekov úıdiń órtenip jatqanyn birden baıqaǵan. Jaqyn mańdaǵy týystarynyń úıinde otyrsa kerek. Terezeden kórshisiniń úıi janyp jatqanyn baıqaǵan. Jalma-jan kıinip, oqıǵa ornyna júgirgen. Qyzyl jalynǵa oranǵan úıdiń esigin aıqara ashyp, dybys qatqanymen, eshkim jaýap bermepti. Qaıtadan dalaǵa shyqqan. Sol kezde baryp úı ishinen shyǵyp jatqan úreıge toly dybysty estigen. Shoshynǵan, óksigen bala daýsy. Tula boıy shymyrlap ketken. Aman alyp qalsa, jarady da.
Bul kezde órt ábden kúshine mingen. Jylannyń tilindeı sýmańdaǵan qyzyl jalyn bet qaratpaıdy. Úıdiń tóbesi opyrylyp túsýi de múmkin, as úıde gaz ballony bolsa she?! Adam dál osyndaı shaqta ózine tóner qaýip-qaterdi tarazyǵa salyp salmaqtap, oı eleginen ótkizip te úlgermeıtin bolar. Rýslannyń aıtýyna qaraǵanda, bar nıeti, peıili endi-endi órt qushaǵynda qalýy ábden múmkin balalardy qutqarý bolǵan. Sol sebepti de basyn báıgege tikken.
– Esik arqyly kirý múmkin bolmaǵandyqtan, kóp oılanbastan birden terezeni syndyrdym. Ol da ońaı bolmady, temir tormen bekitip tastaǵan eken. Qolymda qural da joq. Áıteýir, boıyma bir tylsym kúsh quıylyp, qoparyp aldym, – deıdi Sh.Ýálıhanov atyndaǵy áskerı kolledji oqý ortalyǵynyń qyzmetkeri Rýslan Ánýarbekov, – aldymen dybys shyqqan jerdi sıpalap qarmanyp, qyz balany alyp shyqtym. Bul kezde bólme buryshyn saǵalap qalǵan ekinshi balany da taýyp aldym.
Qaýip-qater shyn tónip kelgende abdyrap, abyrjymaı, naǵyz erlerge tán is-qımyl jasaǵan Rýslan óziniń bul áreketin erlik dep eseptemeıdi. Onyń oıynsha, óz eliniń patrıoty bolý, áskerı boryshyn ótep, eline qyzmet etý – árbir jas qazaqstandyqtyń mindeti. Osy jolǵy oqıǵa tárizdi adam ómiri qaýiptiń nysanasyna baılanǵan kezde qımyl kórsetý er adamnyń peshenesine jazylǵan paryz ispetti.
– 2009 jyldyń aqpan aıynan bastap áskerı qyzmettemin. Otbasym, eki qyzym bar. Elge qyzmet etý ózime qatty unaıdy, – deıdi ol.
Elimizde ózgeniń ómiri úshin ottan, sýdan qoryqpaı, boryshyn adal atqaratyn osyndaı erlerdiń baryna shúkirshilik. Al ózderiniń erligin jaı ǵana paryzǵa balaýy azamattyń boıyndaǵy qarapaıymdylyqty meńzep turǵan joq pa?! Ortaq shańyraqtyń ýyq-keregesin bekitetin de osyndaı abzal azamattar.
Aqmola oblysy,
Býrabaı aýdany