Taraz qalasyndaǵy «Balasaǵun» ortalyq konsert zalynda Jambyl oblysy ákimdiginiń qoldaýymen jáne oblystyq mádenıet, arhıvter jáne qujattama basqarmasynyń uıymdastyrýymen jyr alyby Jambyl Jabaevtyń týǵan kúnine jáne Aulieata-Media jaýapkershiligi shekteýli seriktestigine qarasty oblystyq «Aq jol» gazetiniń júz jyldyǵyna oraı, «Jambyl – meniń jaı atym, halyq – meniń shyn atym» atty respýblıkalyq aqyndar aıtysy ótti. Jyl saıyn dástúrli túrde uıymdastyrylyp kele jatqan aıtystyń betasharyn oblys ákiminiń orynbasary Dáýlet Káribek sóz sóılep ashyp, aqyndarǵa sáttilik tiledi.
Jyr alamanyna elimizdiń ár aımaǵynan 18 aqyn qatysty. Aıtysty belgili aıtysker aqyn, Qazaqstannyń eńbek sińirgen qaıratkeri Amanjol Áltaev júrgizip otyrdy. Taraz tórinde ótken aıtysqa aqyn, Qazaqstannyń eńbek sińirgen qaıratkeri Qaıyrbek Asanov, aqyn, Ǵalym Jaılybaı, aqyn, Parlament Májilisiniń depýtaty Janarbek Áshimjan, respýblıkalyq jyrshy-termeshiler odaǵy Jambyl oblystyq fılıalynyń tóraǵasy, aıtysker aqyn Ahmetjan О́zbekov, jazýshy, oblystyq Aq jol gazetiniń bas redaktory Oralhan Dáýit, aıtysker aqyn Baýyrjan Halıolla syndy qalamgerler qazylyq etti.
Jalpy, aqyndar toǵyz jup bolyp aıtysty. Sóz ustalary negizinen Áýlıeata óńiriniń tarıhyn, búgingi jetken jetistigin, sondaı-aq Aq jol gazetiniń tarıhyn da jyrǵa qosty. Aq jol gazeti 1922 jyly 1 mamyr kúni alǵash ret «Kedeı erki» degen ataýmen jaryq kórgen. Munda ár jyldary elimizge belgili qalamgerler jumys istegen. Jambyl óńiriniń búkil tarıhy atalǵan basylym betterinde tunyp tur.
Qazylar alqasynyń sheshimimen «Jambyl – meniń jaı atym, halyq – meniń shyn atym» atty respýblıkalyq aqyndar aıtysynyń bas júldesi batystyq Baýyrjan Shırmeden men jambyldyq Qanat Myrzahan ekeýine berildi. Al birinshi oryndy Soltústik Qazaqstan oblysynan kelgen Jarqyn Juparhan jeńip alsa, ekinshi oryndy shymkenttik Birjan Baıtýov ıelendi. Sonymen qatar úshinshi oryn Aq jol gazetiniń arnaıy syılyǵy qaraǵandylyq Aıtbaı Jumaǵulov, qyzylordalyq Meıirbek Sultanhan jáne tarazdyq Eset Dosalyǵa buıyrdy. Jalpy, aıtysqa qatysýshy barlyq aqynǵa Alǵys hat tabystaldy. Júldeger jáne qatysýshy aıtyskerlerdiń bárine aqshalaı syılyqtar men «Jambyl jyraý» kitaby syıǵa tartyldy. Aıtys alamanyna arnaıy kelgen Jambyl oblysynyń ákimi Berdibek Saparbaev qazylar alqasy men aıtysker aqyndarǵa rızashylyǵyn bildirdi. «Mynadaı aýmaly-tókpeli zamanda dástúrimizdi jalǵastyrýymyz kerek. Jambyl babamyz da eldiń birligin jyrlaǵan. Búgin sizderdiń eńselerińiz kóterildi, tańerteńnen beri kelip otyrǵandaryńyz aqyndarǵa degen qurmetterińiz dep bilemin. Biz bir-birimizge tileýles, qazaq degen halyqpyz. Kıeli Áýlıeata jerinde aıtystyń kóshi jolǵa shyqty. Alda naýryz aıy, bul aı biz úshin mereke. Shańyraǵymyzdan shattyq ketpesin, el tynysh, irgemiz berik bolsyn», dedi ákim.
Marapattaý rásimi barysynda aıtysker aqyn Baýyrjan Halıolla oblystyq Aq jol gazetiniń bas redaktory Oralhan Dáýit pen aıtysker aqyn Ahmetjan О́zbekovke Syrym Datuly atyndaǵy arnaıy tósbelgini tabystady.
Jambyl oblysy