Ýkraınadaǵy soǵys bastalǵaly beri Qazaqstan azamattaryn elden evakýasııalaý jumystary júrip jatyr. Búginge deıin 553 otandasymyz elshilikterdiń kómegi arqyly Ýkraınada qaýipsiz aımaqqa shyǵaryldy.
Atap aıtqanda, soǵys bastalǵaly beri Polshaǵa – 526 adam, Moldovaǵa – 21 adam, Majarstanǵa – 5 adam, Slovakııaǵa 1 adam jetkizilip, sondaǵy Qazaqstan elshilikteri olardy qonaqúılerge ornalastyrǵan. Moldovaǵa barǵan 9 adam odan ári Rýmynııaǵa ótken. Sonyń jeteýi Qazaqstanǵa ushyp keldi. Eki otandasymyz qazir Býhareste qonaqúıde.
Qazirgi tańda otandastarymyzdy elge ákelý Air Astana áýe kompanııasy arqyly júzege asyrylyp jatyr. Evakýasııalyq ushaqtar úsh ret reıs oryndap, Qazaqstanǵa 432 adam qaıtty. Qazirgi tańda tórtinshi evakýasııalyq ushaqty jiberý boıynsha jumys júrgizilýde. Reıs Katovıse qalasynan (Polsha) ushady.
Osy oraıda, dıplomattarymyzdyń eńbegin erekshe atap ótken jón. Olar azamattarymyzdy soǵys bolyp jatqan eldiń aýmaǵynan áketýdi, joǵaryda atalǵan memleketterdiń shekarasynan ótýdi qamtamasyz etti. Sondaı-aq otandastarymyzdy jınap, olardy ornalastyryp, Qazaqstanǵa qaıtarýdy múltiksiz uıymdastyryp otyr.
Syrtqy ister mınıstrliginiń habarlaýynsha, osyǵan deıin Ýkraınadan shyqqan birqatar otandasymyz Eýropalyq odaq aýmaǵynda qalýǵa sheshim qabyldaǵan. Búginde Katovıse qalasynda 30 azamaty ornalasqan. Ýkraına-Polsha shekarasynda 30 jolaýshysy bar taǵy 1 avtobýs óz kezegin kútip tur. Lvovtaǵy Qazaqstannyń Qurmetti konsýldyǵynyń janyndaǵy evakýasııalyq jınaý ornynda – 9 adam, Kıevtegi Qazaqstan elshiliginde – 10 adam, Harkovta 7 adam bar.
«Atameken» UKP-nyń aqparatyna sáıkes, Ýkraınadaǵy soǵys bastalǵaly atalǵan eldiń aýmaǵynda elimizdiń 55 avtokóligi qalyp qoıǵan. Olardyń 47-i Qazaqstan azamaty. 8 júrgizýshi shet memleketterdiń azamaty.
Qazirge deıin osy 55 avtokóliktiń 31-i Ýkraınadan shyqqan. Sonyń ishinde 11-i Reseıge, Moldovaǵa – 8, Polshaǵa 12 kólik ótken. Qalǵan 24 avtokólik Ýkraına aýmaǵynda. Indýstrııa jáne ınfraqurylymdyq damý mınıstrliginiń habarlaýynsha, Ýkraınadan shyǵyp úlgermegen 11 júrgizýshi qazirgi ýaqytta Polsha shekarasyndaǵy Rava-rýsskaıa (Ýkraına) – Grebene (Polsha) ótkizý beketine qaraı jiberilgen. Olar ári qaraı Belarýs jáne Reseı aýmaqtary arqyly elge bet túzemek. Syrtqy ister mınıstrligi júrgizýshilerdiń bárimen baılanys ornatqanyn habarlady. Olardyń tizimi jasalǵan, avtokólikterdiń ornalasqan jeri naqtylandy. Budan bólek, Indýstrııa jáne ınfraqurylymdyq damý mınıstrligi men «Qazaqstan temir joly» Ýkraınada qalyp qoıǵan 1007 júk vagonyn elge qaıtarýǵa talpynyp jatyr. Sonymen qatar Ýkraınaǵa barar jolda ártúrli júkter tıelgen 680 vagon toqtatylǵan. Onyń ishinde 371 vagon basqa baǵyttarǵa jiberildi.
Halyqaralyq tasymaldarǵa qatysty týyndaǵan máselelerdi jedel sheshý úshin Indýstrııa jáne ınfraqurylymdyq damý mınıstrligi, «Qazaqstan temir joly», elimizdegi teńiz porttary janynda jedel jeli ashylǵan. Múddeli taraptarmen kelissózder júrgizilip jatyr. Aıtpaqshy, Indýstrııa jáne ınfraqurylymdyq damý mınıstrligi Aqtaý jáne Quryq porttary qalypty rejimde jumys istep turǵanyn habarlady. Júk tasymaly ázirge kidirgen joq.
Qazaqstandyq júk jóneltýshiler men tasymaldaýshylardy qoldaý maqsatynda Baký, Mahachkala, Amırabad, Anzalı sekildi seriktes porttarmen tyǵyz baılanys ornatylǵan. Jalpy, elimizdiń porttary 10 mln tonnaǵa deıin qosymsha júk, sonyń ishinde 5,5 mln tonna munaıdy tasymaldaýǵa jiberýge qabiletti.
Osy oraıda, Batys elderiniń Qazaqstanǵa sanksııa salýǵa nıetti emes ekenin aıta ketken jón. Bul týraly Ulybrıtanııanyń Qazaqstandaǵy elshisi Ketı Lıch Qazaqstan Syrtqy ister mınıstriniń orynbasary Roman Vasılenkomen ótken kezdesýde aıtty. Ulybrıtanııa tarapy Reseıdiń Ýkraınadaǵy soǵysyna baılanysty Qazaqstanǵa qatysty qandaı da bir sanksııa engizýge nıetti emes ekenin rastady.