Baıanaýyl aýdanyna at basyn burǵan kez kelgen meıman eń áýeli áýlıe aqyn, uly oıshyl, ensıklopedıst, tarıhshy, fılosof Máshhúr Júsip Kópeevtiń kesenesine barýdy ańsap turady. Odan bólek, Eskeldi shatqalyndaǵy memorıaldyq mýzeıde ǵulamanyń biregeı zattary saqtaýly.
Mýzeıdiń ekskýrsııa jetekshisi Mádına Pazylovanyń aıtýynsha, qorda Máshhúr Júsip jazyp qaldyrǵan qoljazbalar kóneligine qaramastan, kópshiliginiń sapasy kóńil tolarlyq. Jazý barysynda kók, qyzyl, qara jáne ózge de sııalar ónbegen, tek sý tıgen betteriniń shetki tustary ǵana óshirilip qalǵan ne úzilgen eken.
– Qazirgi tańda mýzeıde boıtumar, taqııa, qorjyn, omyraýsha, shalbary men belbeýi syndy ózge de jeke zattary qoıylǵan. Sondaı-aq mazar úıinde kitap salynyp turǵan shkaf bar. Bul shkafqa kishi uly Muhammed-Fazyl ıe bolǵan. Al mýzeıge eksponat retinde 2019 jyly aqynnyń nemeresi Qajymuqan Pazylov ótkizgen. Muny «býfet shkafy» dep ataıdy. Sebebi onyń ishinde ydys-aıaq saqtaıtyn bolǵan, – deıdi ol.
Máshhúr Júsip kózi tirisinde máńgilik mekenin eki bólmeli etip saldyrǵan. Mazar sáýlet ónerine jatpasa da, babamyz onyń beriktigine, qurylysty oryndaýshy adamdarǵa asa úlken mán berdi. Kire beris bólmesine Quran, kitap, ydys-aıaq, ertoqym, at ábzelderi, nasybaı úkkishi men shaqshasyn, sondaı-aq tutynǵan zattaryn saqtaýdy tapsyrdy. Munysy olaı-bulaı júrgen jolaýshylar paıdalansyn degen maqsatty kózdegen eken. Sol sebepti babamyzdyń ár jazbasy men zattary, kitaptarynyń bizge jáne bizden keıingi urpaqqa berer tárbıesi men danalyǵy mol.