Qazaqstan – «Devıs kýbogynyń» fınalynda

Norvegııa – Qazaqstan quramalary arasyndaǵy tartysty kezdesý naý­ryzdyń 4-5-i kúnderi Oslodaǵy Oslo Tennisarena sport kesheninde ótti. 2000 jyly boı kótergen jabyq keshendegi tennıs ortalyǵy keıingi jyldary jergilikti quramaǵa sáttilik ákep, osy ortalyqta birqatar oıynda jeńiske jetken eken. Atap aıtqanda, olar byltyr Barbados (4:0), О́zbekstan (3:1) jáne Ýkraına (3:1) tennısshilerin tize búktirgen. Norvegııalyqtar bıyl da 2021 jyldaǵy jeńisti jolyn jalǵastyrýǵa nıetti edi. Alaıda Aleksandr Býblık bastaǵan jigitter álemniń 8-raketkasy sanalatyn Kasper Rýýdtyń otandastaryna esh múmkindik qaldyrmady.

Irikteý jarysynyń jerebesi bo­ıyn­sha, 4 naýryzdaǵy alǵashqy oıyn kúni birinshi bolyp kortqa Mıhaıl Kýkýshkın men Kasper Rýýd, sodan keıin Aleksandr Býblık pen Vıktor Dýra­sovıch shyǵatyn boldy. Ekinshi kúnge josparlanǵan úsh kezdesýde aldymen Aleksandr Nedovesov pen Andreı Golý­bev juptyq synda Kasper Rýýd – Vıktor Dýrasovıchpen, sosyn Býblık pen Rýýd, Kýkýshkın men Dýrasovıch kezdesetin bolyp bekitildi.

Birinshi jarys kúniniń básekesinde kortqa birinshi bolyp álemniń 160-raketkasy Mıhaıl Kýkýshkın men ATP reıtınginde 8-orynda turǵan Kasper Rýýd shyqty. Alǵashqy sette Kasper jerlesimizden esh qıyndyqsyz aılasyn asyrdy – 6:1. Ekinshi kezeńde Rýýd jeńiske jetý úshin biraz eńbektenýge týra keldi. О́ıtkeni M.Kýkýshkın oıyn tizginin óz qolyna alyp, dopty oıynǵa qosý kezeginde únemi esepte alǵa shyǵyp otyrdy. Altynshy geımge deıin tarazy basy 3:3 bolyp teńesip turǵan-dy. Biraq jetinshi geımde Rýýd breık jasap, esepte alǵa shyqty. Norvegııanyń birinshi raketkasy keıingi geımde de bilgeninen jańylmaı, bul setti de óz paıdasyna jazdy – 6:4. Osylaısha, Kasper Rýýd Norvegııa quramasyna alǵashqy jeńisin syılady.

Birinshi kúnniń ekinshi kezdesýinde Aleksandr Býblık pen Vıktor Dýrasovıch kim myqtyny anyqtady. Býblık Qazaqstannyń birinshi, álemniń 32-raketkasy bolsa, qarsylasy dúnıejúzilik reıtıngte 321-orynda tur. Birinshi partııada birden oıyn tizginin qolyna alǵan qazaqstandyq tennısshi eki geımnen breıkpen alǵa shyqty – 2:0. Osy basymdyqty birinshi partııanyń sońyna deıin saqtaı bilgen otandasymyz 6:3 esebimen jeńiske jetti. Ekinshi sette esep 2:2 bolǵan kezde Býblık breık jasap, alǵa shyqty. Keıinnen taǵy da bir breıkke qol jetkizdi – 5:2. Al kezdesýdiń sońǵy geımin eıspen aıaqtady – 6:2. Bir saǵattan sál astam ýaqytqa sozylǵan báseke barysynda Býblık 11 eıs jasap, 3 breıkke qol jetkizdi. Sóıtip Aleksandr Qazaqstan – Norvegııa matchynda tarazy basyn teńestirip, jankúıerlerge qýanysh syılady.

Osy kezdesýdegi birinshi settiń ekinshi geıminde Oslodaǵy tennıs arenasynda elektr jaryǵy óship, tóreshi kezdesýdi 10 mınýtqa toqtatýǵa májbúr boldy. Matchtan keıingi baspasóz máslıhatynda Aleksandr Býblık elektr qýatynyń óshýi oıynnyń basynda bolǵandyqtan, onyń kóńil kúıine áser etpegenin aıtty. «Eger bul taı-breıkte oryn alsa, bálkim bul ekeýmizdiń birimizge zııan tıgizer edi. Sondyqtan biz jaǵdaıdy salqynqandy qabyldaýǵa tyrysýymyz kerek. Vıktor jaqsy oınady, keı sátterde azdap qobal­jydy. Men jaqsy oınadym, solaı bolýy kerek edi. Sondyqtan matchtyń ba­rysy negizinen anyq boldy», dedi A.Býblık.

Oslodaǵy Norvegııa – Qazaqstan matchynyń ekinshi oıyn kúnin juptyq synda baq synaıtyn tennısshiler bas­tap berdi. Bul básekede norvegııalyqtar sapynda Kasper Rýýd pen Vıktor Dýra­sovıch jup qurap óner kórsetýi kerek edi. Alaıda Norvegııa quramasynyń kapı­tany (bas jattyqtyrýshy) Anders Hoset Rýýdqa demalys berip, 23 jastaǵy Sımen Sýnde Bratholmge senim artty. Sóıtip ol Vıktor Dýrasovıchpen birge qazaqstandyqtar Andreı Golýbev pen Aleksandr Nedovesovke qarsy turdy. Birinshi sette norvegııalyq jup 4:1 esebimen alǵa shyqty. Degenmen qazaqstandyq tennısshiler sońǵy sátke deıin oınap, 12 geımde tarazy basyn teńestirdi. Sosyn taı-breıkte 12:10 ese­bimen basym túsip, jeńisti julyp aldy – 6:7. Ekinshi sette qazaqstandyq jup taǵy bir breık jasap, matchty je­ńispen támamdady – 6:3. Eki saǵat­qa jý­yq ýaqytqa sozylǵan matchta qazaq­standyqtar 1 eıs jasap, 7 breık-poınt­tyń ekeýin paıdalana bildi. Ekin­shi kúnniń birinshi matchynan keıin Qazaq­stan quramasy 2:1 esebimen alǵa shyqty.

Tórtinshi kezdesýde Qazaqstan men Norvegııanyń birinshi raketkalary Aleksandr Býblık pen Kasper Rýýd sheberlik baıqasty. Bul kezdesý jerlesimiz úshin óte erekshe match bolatyn. О́ıtkeni Býblık buǵan deıin Rýýdpen kortta úsh márte kezdesip, úsheýinde de jeńilip qalǵan bolatyn. Sondyqtan bul match Aleksandrǵa Kasperden ese qaıtarýǵa jáne Qazaqstan quramasyn merziminen buryn týrnırdiń fınalyna shyǵarýǵa tamasha múmkindik edi. Qýanyshqa qaraı, kezdesý Býblık josparlaǵandaı ótip, ótken úsh je­ńistiń esesin qaıtardy. Asa tartys­ty kezdesýdiń birinshi partııasynda breık jasaǵan qazaqstandyq tennısshi basym­dyq tanytty – 6:4. Ekinshi sette K.Rýýd ese qaıtardy – 7:5. Úshinshi, she­shýshi partııany Býblık áýeli breıktiń arqasynda jeńispen bastap (2:0), match sońynda 6:4 esebimen jeńiske jetti.

Osylaısha, Qazaqstan quramasy qo­naqta Norvegııa quramasyn 3:1 esebi­men utyp, bıyl kúzde ótetin Devıs ký­bogynyń fınaldyq kezeńine joldama aldy. Fınalda Qazaqstannan bólek, irikteýde jeńiske jetken Aýs­tralııa, Ońtústik Koreıa, Nıderland, Is­panııa, Fransııa, Argentına, Belgııa, Shvesııa, Italııa, AQSh jáne Germanııa quramalary men tikeleı joldamaǵa ıe bolǵan Horvatııa, Ulybrıtanııa Serbııa jáne byltyrǵy chempıon Reseı quramasy oınaıdy. Biraq ázirge Reseıdiń Ispanııaǵa barý-barmaýy sheshilgen joq.