Indýstrııa jáne ınfraqurylymdyq damý mınıstrligi baspasóz qyzmetiniń uıymdastyrýymen ótken MIIR PRESS CUP – 2022 týrnırine respýblıkalyq BAQ-tardan 7 qyzdar komandasy qatysty: «Qazaqstan» RTRK, «Habar» agenttigi, «Jetinshi arna», «Eýrazııa – Birinshi arnasy», «Baq.kz» aqparattyq portaly, «Egemen Qazaqstan» jáne «Aıqyn» gazetteri.
Jerebe qorytyndysy boıynsha komandalar eki topqa bólinip, olardyń jeńimpazdary fınalda týrnır kýbogyna talasty. Bas sporttyq júlde aqtyq saıysta jeńiske jetken «Qazaqstan» RTRK komandasyna buıyrdy. Ekinshi oryndy «Jetinshi arna» qyzmetkerleri ıelendi. Qola júlde «Habar» agenttiginiń qorjynynda. Júldeli tórtinshi oryn «Baq.kz» aqparattyq portalynyń arýlaryna tapsyryldy. Jarysqa belsendi qatysqan «Eýrazııa – Birinshi arnasy» telearnasy – «Kórermen kózaıymy», «Egemen Qazaqstan» gazeti – «Eń súıkimdi komanda», «Aıqyn» gazeti «Eń sulý komanda» atalymdaryn ıelenip, baǵaly syılyqtarmen marapattaldy.
«Jarys maqsaty – jýrnalıster arasyndaǵy dostyqty arttyrý, Halyqaralyq áıelder merekesimen quttyqtaý. Sporttyq saıys bolǵandyqtan sala-matty ómir saltyn nasıhattaý. Dostyq bar jerde ósý bar, birlik bar jerde-bereke bar. Sony qoldap, búgin osyndaı is-shara ótkizip jatyrmyz. Bul jerde mańyzdysy – júldeli oryn alý emes, osynda kelip qatysý, bas qosyp, bir-birimen tanysý. Bizdiń de uıymdastyrýdaǵy maqsatymyz sol», dedi IIDM baspasóz hatshysy Janjigit Omarhan.
Aıta keterligi, týrnırge Qazaq geophysics jáne Kazakhmys barlau kompanııalary qoldaý bildirdi. Uıymdastyrý jumystaryna BAQ League jýrnalıster lıgasy atsalysty. BAQ League BAQ ujymdary úshin tımbıldıng. Buǵan deıin mını-fýtboldan toǵyz maýsym jáne voleıboldan chempıonat ótkizgen. Jalpy alǵanda, BAQ League maýsymdaryna Qazaqstannyń túrli óńirlerinen 50-den astam BAQ-tan 700-den astam jýrnalıst qatysty.