Mańǵystaý oblysynyń ortalyǵy – Aqtaý qalasynyń soty Shetpe kentiniń úsh turǵynyn júkti áıeldi zorlaǵandary úshin sottady. Bul týraly Lada.kz habarlady.
Qylmystyq is materıaldaryna sáıkes, budan birneshe aı buryn úlkeni 26-daǵy, kishisi 23-tegi úsh jigit Shetpe eldi mekeninde turatyn, júktiligine bes aı bolǵan, úsh balanyń anasy, 30 jastaǵy áıeldi birneshe saǵat boıy kezektesip zorlaǵan. Sol kúni úsh jigit ishterindegi biriniń ákesiniń kóligin minip júrip, dúkenniń janynan S. esimdi kelinshekti kezdestiredi. Jigitterdiń biri onymen jaqsy tanys eken. Bolashaq qurbandyqtaryn olar mashınaǵa zorlap mingizip, ózderimen birge ala ketedi.
Qaskóıler kelinshekti Shetpeden 5 shaqyrym qashyqtyqtaǵy Aýsary degen ákeledi. Jolda áıel ózin jiberýdi talap etip, qarsylyq kórsetip baǵady. Biraq munyń ornyna qorqaýlar jeter jerlerine jetkesin oılaryna kelgenderin isteıdi. Olardy tipti aralaryndaǵy biriniń kelinshekpen jaqsy tanys ekeni de toqtatpaıdy. Qaıta qarsylyq bildirse, ózin óltirip, dalaǵa kómip ketetinderin aıtyp, qorqytady.
Anyqtalǵandaı, S.-nyń qalqansha bezi aýyrýy tórtinshi kezeńge jetken eken. Sondyqtan udaıy dári paıdalanatyn bolǵan. Kelinshek zorlyqshylarǵa muny da aıtqan. Biraq olar buǵan qulaq aspaǵan. Kerisinshe qorlyqtaryn odan ári jalǵastyra túsken. Olar sosyn zorlyqtaryn basqa jerde jalǵastyrmaqshy bolǵan. Sóıtip, tynyǵý bazasyndaǵy monshany jaldaıdy. Osy jerde zorlaýdy qaıta jalǵastyrady. Bul jerde taǵy eki saǵattan astam ýaqyt ábden qınaıdy. Buǵan qosa, tynshymaıtyn bolsa, osy jerdegi túrik júrgizýshilerge beretinderin aıtyp úreıin alady.
Keshke qaraı Shetpeniń shetine ákelip, tastap ketedi. Eger bolǵan jaıdy bireýge aıtar bolsa, anasyna zalal keltirip, ózin óltiretinderin bildiredi. Al qur súlderi qalǵan áıel birden ápkesiniń úıine jetip, bolǵan jaıdy baıandap beredi. Sodan soń áıeldiń týystary quqyq qorǵaý organdaryna shaǵymdanady.
Polısııa zorlyqshylardy birden izdeýge kiristi. Zardap shegýshi áıelge tanys jigit arqyly artynsha bárin qolǵa túsirdi.
«Sot prosesinde sottalýshylar kórsetý berýden bas tartty. Alaıda, jınalǵan talassyz aıǵaqtar, sonyń ishinde kýálardyń kórsetýleri men saraptama olardyń osy qylmysty jasaǵandaryna esh kúmán keltirmedi. Anyqtalǵandaı, zorlyqshylardyń barlyǵy da úılengen, kishkentaı balalary bar jigitter bolyp shyqty», - dedi sot Gúlmarjan Ádilsultanı.
Sot úkim shyǵardy. Ol boıynsha zorlyqshylardyń ekeýi – 7, kóbirek belsendilik tanytqan bireýi 8 jylǵa jalpy rejımdegi kolonııada otyrýǵa jaza aldy. Buǵan qosa, sot moraldyq jáne materıaldyq shyǵyndy óteý retinde zábir kórýshige 865 myń teńge aıyppul tóleýge mindettedi.
Qazir úkim kúshine endi.
Qurysh Nurymbet.
Derekkóz: Lada.kz.
Foto: Lada.kz.