Elimizde qazirgi tańda 450 myńnan asa kópbalaly otbasy bar. Olardyń 60 paıyzynan astamynda tórt bala ósip keledi. Al 20 paıyzdaıynda – bes, 6 paıyzǵa jýyǵynda jeti bala bar eken. Segiz jáne odan da kóp balasy bar otbasylardyń úlesi 1 paıyzdan áreń asady.
Kóktem merekesinde quqyq qorǵaý organdarynda jumys isteıtin kópbalaly analardyń sanyn bilmek bolyp, birneshe vedomstvoǵa habarlasqan edik. О́kinishke qaraı, quqyq qorǵaý salasynda eńbek etip júrgen kópbalaly analardyń arnaıy esebi júrgizilmeıdi eken. Alaıda kadr departamentindegi mamandar qatarlarynda tórt jáne odan da kóp bala tárbıelep júrgen áriptes kelinshekterdiń az emes ekenin maqtanyshpen jetkizdi. Ras, Qarýly Kúshter qatarynda qaısar qyz-kelinshekter kóp. Búginde Qazaqstan armııasynda 12 myńnan asa áıel qyzmet etedi. Onyń 800-ge jýyǵy – ofıser, 20-nyń polkovnık áskerı ataǵy bar, 5 myńǵa jýyǵy – memlekettik qyzmetshi.
Solardyń biri – eldiktiń júgin er azamattarmen birdeı arqalap júrgen kópbalaly ana, Qorǵanys mınıstrligine qarasty Qurlyq áskerleri Áskerı ınstıtýtynyń qyzmetkeri, serjant Gúlmıra Mambetova. Gúlmıra Tastanbekqyzy 2009 jyldan beri áskerı oqý ordasyndaǵy taktıka kafedrasynyń bólimshe (oqý laboratorııasynyń) basshysy laýazymyn abyroımen atqaryp keledi. Al Saǵadat Nurmaǵambetov atyndaǵy ınstıtýttyń basty maqsaty – elimizdiń Qarýly Kúshteri, basqa da áskerleri men áskerı quralymdarynyń qataryn erik-jigeri myqty, batyldyǵy men biliktiligi bıik, tabandylyǵy men tapqyrlyǵy teń, dene daıarlyǵy óte jaqsy ofıserlermen tolyqtyrý.
Jaýapty qyzmet pen qoǵamdyq jumysty qatar alyp júrgen serjant Mambetova ınstıtýttyń áskerı qyzmetshileriniń otbasylary jáne olardyń balalarymen jumysty uıymdastyrý sektoryn basqarady. Instıtýttyń áskerı qyzmetshileriniń ul-qyzdaryn túrli mádenı, áskerı-patrıottyq is-sharalarǵa daıarlap, óskeleń urpaqqa ultty súıýdi, jeńiske jete bilýdi dáriptep júrgen serjant G.Mambetova: «Árıne, áskerı salada er azamattarmen qatar qyzmet atqarýdyń qıyndyǵy men qyzyǵy kóp. Biraq qoıylar áskerı talap pen tártip bárimizge birdeı», deıdi.
Bilimdiligi men zerektiginiń, eńbekqorlyǵy men jaýapkershiliginiń arqasynda ortasynda syı-qurmetke ıe bolyp, jaýyngerlik daıyndyq boıynsha alǵy shepten kórinip júrgen Gúlmıra Tastanbekqyzy áskerı qyzmetshilerdiń qataryndaǵy serjant retinde ınstıtýt basshylyǵynyń ǵana emes, joǵarǵy basshylyqtyń da yqylasyna bólenip keledi. Qyzmet barysynda talaı áskerı qyzmetshiniń balalaryn ónerge baýlyp, otansúıgishtikke tárbıeleýge ózindik úlesin qosyp kele jatqan sektor jetekshisi óz otbasynda altyn asyqtaı uly men kúmis qasyqtaı úsh qyzyn ósirip keledi. Serjant Mambetovanyń qyzdary – Sandýǵash, Uldana men Aıdana ınstıtýttyń áskerı qyzmetshileriniń talantty balalarynan qurylǵan «Jastar» vokaldyq tobynyń quramynda óner kórsetip, kópshiliktiń yqylasyna bólense, uly Aıan Abý-Dabı qalasynda ótken djıý-djıtsý saıysynyń jeńimpazy, Qaraǵandy qalasynda ótken «Aıdahar belbeýi» atty týrnırdiń júldegeri atanǵan.
«Halqymyzda «Áıel bir qolymen besikti, ekinshi qolymen álemdi terbetedi» degen taǵlymdy sóz bar. Ras, áıel tek otbasynyń uıytqysy emes, sondaı-aq barlyq salada erlermen birdeı jaýapkershilikti arqalap, jumys isteıtin qoǵamnyń qozǵaýshy ári belsendi kúshi der edim», deıdi kópbalaly ana. «Áskerı qyzmette júrsem de ana retinde eń birinshi otbasynyń salmaǵy men jaýapkershiligin sezinemin. О́ıtkeni bala tárbıesin, otbasynyń birligi men shańyraǵynyń berekesin, úıdiń turmys-tirshiligin ata-babamyz árdaıym joǵary qoıǵan», degen oıyn bildirgen áskerı qyzmetshi árbir ananyń maqsaty – júregi elim dep soǵatyn azamattardyń sanyn kóbeıtý dep sanaıdy. «Bolashaq ofıserlerdi daıarlaıtyn oqý ordasynda biraz jyldan beri eńbek etip kele jatyrmyn. Sondaǵy kózimniń jetkeni – el qorǵaý deıtin qasıetti de jaýapty qyzmette áıel adamdardan góri er azamattardyń sany kóp bolý kerek. Bul – búgingi ýaqyt pen zamannyń talaby. Sol sebepti de Qarýly Kúshter qataryna egemen elimizdiń erteńine beıjaı qaramaıtyn naǵyz patrıot jastardy tartýymyz qajet. Ol úshin árbir otbasynda ósip kele jatqan bala besiginen túzý tárbıe alyp, bıik maqsatty kózdep erjetýi qajet», deıdi.
«Men áskerı qyzmettegi kópbalaly analardyń birimin. Solaı bola tura bala tárbıesi men áskerı qyzmetti qatar qoıǵanda eń aldymen ózime – analyq qamqorlyǵym men mahabbatyma arqa súıedim. О́ıtkeni bala tárbıesinde, ul men qyzyńnyń sanaly, salıqaly bolyp ósýine, tárbıeli, bir-birine baýyrmal bolýynda ananyń alar orny erekshe. Qaıda júrsem de, qandaı jaǵdaı bolsa da ul-qyzyma «úlkendi qurmette, kishige syıly bol» degen analyq aqylymdy aıtýdan jalyqqan emespin. Sebebi qyzdarymnyń ınabatty, al ulymnyń jigerli bolyp óskenin qalaımyn», deıdi ol. Búginde serjanttyń eki qyzy ustazdyq joldy tańdasa, uly bolashaǵyn sportpen baılanystyrǵan.