Qaraǵandydaǵy Prıshahtınsk dep atalatyn eldi mekende erekshe jandar eńbek etetin kásiporyn bar. Qyryq jyldan beri tynbaı jumys istep keledi. Bul jerdegi sehtarda kólik tehnıkalaryna arnalǵan súzgiler, gofrlengen kartonnan jasalatyn konteınerler, pıssa qorapshalary, bir ret qoldanylatyn ydystar jáne taǵy basqa da suranysqa ıe ónimder shyǵarylady.
Iá, «Qazaq zaǵıptar qoǵamy» qoǵamdyq birlestiginiń Qaraǵandy oqý-óndiristik kásiporny» JShS-nyń bul sehtarynda kózi kórmeıtinder men nashar kóretin jandar jumys isteıdi. Atalǵan kásiporynnyń dırektory Baqytbek Beısebaev Qazaq zaǵıptar qoǵamynyń kooperasııa ádisimen jumys júrgizýge beıim óndiris saıasatyn ustanatynyn aıtady.
– Búginde elimiz boıynsha qoǵamdyq birlestiktiń 29 kásiporny jumys isteıdi. Keıbireýleri jartylaı fabrıkat nemese shıkizat óndiredi, ózgeleri daıyn ónim shyǵarady. Biz palletter, ártúrli kúrdeliliktegi qorapshalar, kraft qaptamasyn jasaımyz. Oblys kóleminde klıentterimiz jergilikti. О́ńirimiz ónerkásipti bolǵandyqtan, ótkizý naryǵy óte aýqymdy, – deıdi ol.
Sonymen qatar kásiporyn teplovozdar, júk kólikteri, traktorlar sııaqty tehnıka túrlerine qajetti maı jáne otyn súzgilerin jasaıdy. Bul ónimge kompanııalar tarapynan ǵana emes, basqa da tutynýshylar jaǵynan suranys kóp. Mysaly, jeke avtokólik ıeleri de munda jıi at basyn buryp turady.
Súzgi shyǵaratyn sehta Andreı Lotarev qolmen sıpap jumys isteýge daǵdylanǵan. Osynda otyz jyldan asa ýaqyt jumys isteıtin sheber súzgilerdi shyǵarýǵa arnalǵan qurylǵynyń qulaǵynda oınaıdy. О́zi qatardaǵy jumysshydan seh bastyǵyna deıin kóterilgen. A.Lotarev jasynyń egde tartqanyna qaramastan, bilim alýǵa qushtarlyq tanytyp júr eken. Bıyl ol kolledjdi qarjyger mamandyǵy boıynsha bitirip, dıplom almaqshy. Taıaýda ol jańa ónimdi – kóshet otyrǵyzatyn sebet jasaý týraly usynys engizdi. Qarapaıym ǵana buıymnyń atqarar jumysy asa tıimdi. Symnan qańqasy jasalyp, ishine agromata materıalynan tigilgen qapshyq salynǵan bul sebetke ólshemine qaraı gúl nemese aǵash kóshetterin otyrǵyzýǵa bolady.
– Agromata ylǵaldy jaqsy saqtaıdy jáne ósimdiktiń tamyr alýyn jeńildetedi, – deıdi kásiporynǵa qarasty jylyjaı meńgerýshisi Marııa Zolotyh.
Jylyjaı demekshi, qazirgi ýaqytta jazǵy maýsymǵa daıyndyq qyzý júrip jatyr. О́ıtkeni kásiporyn qalany kógaldandyrý jumystaryna belsene qatysady. Mundaǵy jylyjaılarda ósetin gúl kóshetterin baǵbandar da, jekelegen uıymdar da kóptep satyp alady eken.
M.Zolotyh kóshetterdi ósirý aqpan aıynda bastalyp, naýryzda jınalyp, mamyr aıynan bastap satylymǵa shyǵarylatynyn aıtady.
– Bizde shyraıgúl dep atalatyn ósimdiktiń onǵa jýyq túri bar. Sonymen qatar bizde ósirilgen marıgold, katarantýs, vıola, salvııa jáne basqa da gúl suryptaryn jazdygúni qala gúlzarlarynan kórýge bolady. Biz tek ábden tekserilgen kásibı tuqymdardy ǵana paıdalanamyz. Bıylǵy josparymyzda 200 myń dana shyraıgúl men 100 myńǵa jýyq basqa gúlder ósirý bar, – deıdi ol.
Jylyjaı meńgerýshisiniń qaramaǵynda kózi nashar kóretin gúl ósirýshiler jumys isteıdi. Qazirgi ýaqytta eki qyzmetker jumystyń bárin tyndyryp júr. Al naýryzda qosymsha jumys kúshi qajet bolady.
Kásiporyndaǵy ónimdi jumys isteıtin bólimsheniń biri – tigin sehy. Mundaǵy ismerler tósek-oryn jaımalarynan bastap arnaıy jumys kıimderine deıin tigedi. Qoly altyn sheberdiń biri Tatıana Ognevaıa zaǵıptarǵa arnalǵan ınternatta oqyǵan eken. Oqýyn bitirgennen keıin synyptastaryna qosylyp, osy jerge jumysqa ornalasypty. Eńbek etip júrgenine úsh jyldaı bolǵan.
– Jaǵdaıymyz jaman emes. Eń bastysy – tabys tabýǵa múmkinshilik bar, – deıdi ol toq kóńilmen.
Prıshahtınsk eldi mekenindegi «Qazaq zaǵıptar qoǵamy» qoǵamdyq birlestiginiń Qaraǵandy oqý-óndiristik kásipornynda qazirgi ýaqytta 25 adam jumys istep, nápaqa taýyp júr. Kásiporyn basshylarynyń bolashaqqa degen jospary da kóńilge senim uıalatady: kerege keńitip, taǵy da jıyrma shaqty adamdy jumysqa almaqshy.
Qaraǵandy oblysy