О́tken demalys kúnderi fýtboldan Qazaqstan chempıonatynyń jańa maýsymy bastaldy. 2022 jylǵy el birinshiliginiń 1-týr oıyndary jankúıerlerdiń esinde qalatyndaı erekshe oqıǵalarǵa toly boldy. Birinshi kúnge josparlanǵan birinshi týrdaǵy bes matchtyń tórteýinde jeńimpaz komanda anyqtalmady.
Alǵashqy týrdyń shymyldyǵyn Shymkenttiń «Ordabasy» men Premer-lıga debıýtanty – Túrkistan oblysynyń «Maqtaaral» komandalary ashty. Shymkenttegi Qajymuqan atyndaǵy stadıonda ótken ońtústik derbıinde komandalardyń kúshi teń boldy. Kezdesýdiń esebin jáne bıylǵy chempıonattyń tuńǵysh golyn «Maqtaaraldyń» fransııalyq legıoneri Bıllal Sebaıhı soqty. Degenmen alań qojaıyndary birinshi taımnyń sońyna deıin tarazy basyn teńestirip úlgerdi. Gol avtory – Serja Nıýadzı.
Sonymen qatar birinshi týrdyń taǵy úsh kezdesýinde de teń esep tirkeldi. Bıylǵy birinshiliktiń taǵy bir debıýtanty – «Aqsý» (Pavlodar oblysy) da syrt alańda «Atyraýmen» teń oınap (0:0), qarsylasynan upaı alsa, Túrkistandaǵy «Turan» – «Taraz» jáne «Astana Arenadaǵy» «Astana» – «Shahter» oıynynda esep ashylmady. Biraq sońǵy matchtaǵy básekede «Astana» klýbynyń bas bapkeri Srdjan Blagoevıch alańǵa bir mezette 7 legıoner shyǵaryp, chempıonat erejesin buzdy. Endi elorda komandasyna tehnıkalyq jeńilis jazylýy múmkin. О́ıtkeni Qazaqstan birinshiliginiń erejesi boıynsha, alańda bir ýaqytta 6 legıonerdiń oınaýyna ruqsat etilgen.
Byltyr birinshiliktiń týrnır kestesinde tórtinshi orynǵa taban tirep, Eýrokýbok básekesine joldama alǵan Petropavldyń «Qyzyljary» Aqtaýda «Kaspııden» 0:1 esebimen jeńilip qaldy. Oıyndaǵy jalǵyz ári jeńisti goldy 66-mınýtta Aslan Ádil saldy.
Jeksenbi kúni Almatydaǵy Ortalyq stadıonda «Qaırat» pen «Aqtóbe» kezdesti. Maýsymaralyq úziliste quramyn birqatar tájirıbeli fýtbolshymen kúsheıtken aqtóbelikter birinshi taımda táýir oınap, alań ıeleri qaqpasynyń mańaıynda biraz qaýipti shabýyl uıymdastyrdy. Al jastarǵa senim artqan «Qaırat» qorǵanýmen boldy. Ekinshi taımda alańǵa Hose Kante shyqqanǵa deıin de qonaqtar oıynda basymdyq tanytyp jatqan edi. Gvıneıalyq shabýylshy matchqa aralasqan sátten keıin «Qaırattyń» oıynyna qan júgirip, shabýylda jıi boı kórsete bastady. Sóıtip 66-mınýtta Kante 11 metrlik aıyp dobyn sátti oryndap, esep ashsa, 86-mınýtta dýbldiń avtory atandy. Osylaısha, «Qaırat» birinshi týrdaǵy eń iri esepti tirkedi – 2:0.
Byltyrǵy el chempıony – «Tobyl» Qostanaıda Oraldyń «Aqjaıyq» klýbyn qabyldap, 1:0 esebimen jeńdi. Match aldynda fýtbol mamandary bul kezdesýde «Tobyl» fýtbolshylary esh qıyndyqsyz iri eseppen jeńiske jetedi dep boljam jasaǵan edi. Alaıda «Tobyl» birinshi taımda «Aqjaıyqtyń» ájeptáýir qarsylyǵyna ushyrap, gol soǵa almady. Matchtyń ekinshi taımynda da «Tobyl» uzaq ýaqyt qarsylas komandanyń qaqpasynan sańlaý taba almady. Tek 78-mınýtta ǵana ózbekstandyq shabýylshy Igor Sergeev gol soǵyp, «Tobylǵa» mańyzdy úsh upaı syılady.
Birinshi týrdyń statıstıkalaryna toqtalar bolsaq, chempıonattyń alǵashqy golyn, joǵaryda aıtyp ótkendeı, Bıllal Sebaıhı soqty, al alǵashqy sary qaǵazdy «Maqtaaraldyń» qorǵaýshysy Ilııas Ámirseıitov aldy. Jalpy, birinshi týrda 27 fýtbolshy sary qaǵazben jazalandy. Alǵashqy qyzyl qaǵaz «Shahterdiń» legıoneri Ábdel Lamanjege kórsetildi. Sondaı-aq birinshi týrda «Turannyń» qorǵaýshysy Sultan Ábilǵazy da alańnan qýyldy. Alǵashqy penaltıdi Hose Kante sátti oryndady.
Sonymen qatar bıyldan bastap Qazaqstan chempıonatynda VAR júıesi qoldanylyp jatyr. «Qaırat» – «Aqtóbe» oıynynda bas tóreshi Grıgorıı Moskovchenko birinshi bolyp VAR kómegine júgindi. Birinshi týrdaǵy jeti oıyndy tamashalaý úshin jeti qaladaǵy stadıonǵa jalpy sany 19 300 kórermen keldi. Eń kóp jankúıer (9 200 adam) «Qaırat» – «Aqtóbe» matchyn tamashalady.
2-týr oıyndary 10-11 naýryz kúnderi ótedi. 10 naýryzda (beısenbi) «Aqsý» – «Astana», «Taraz» – «Ordabasy», «Qyzyljar» – «Shahter» komandalary, al 11 naýryzda (juma) «Maqtaaral» – «Qaırat», «Kaspıı» – «Tobyl», «Aqtóbe» – «Atyraý» jáne «Aqjaıyq» – «Turan» komandalary kezdesedi.